കുവൈറ്റിലെ അതിദാരുണമായ തീപ്പിടുത്തത്തിൽ ദു:ഖം രേഖപ്പെടുത്തി ഇന്ത്യൻ പ്രധാനമന്ത്രി നരേന്ദ്ര മോദിയും വിദേശകാര്യ മന്ത്രി എസ് ജയശങ്കറും. സംഭവത്തിൽ മരണപ്പെട്ടവരുടെ കുടുംബാംഗങ്ങളെ അനുശോചനം അറിയിക്കുന്നതോടൊപ്പം മരണപ്പെട്ടവർക്കും പരിക്കേറ്റവർക്കും സഹായ വാഗ്ദാനങ്ങൾ നൽകാനും രണ്ടു പേരും മറന്നില്ല.
കുവൈറ്റിലെ ഇന്ത്യൻ അംബാസഡർ ആദർശ് സ്വൈക സംഭവസ്ഥലം സന്ദർശിച്ച് വിവരങ്ങൾ ശേഖരിച്ചതായി ജയശങ്കർ പറഞ്ഞു. “ സംഭവത്തിൽ ദാരുണമായി ജീവൻ നഷ്ടപ്പെട്ടവരുടെ കുടുംബങ്ങൾക്ക് അഗാധമായ അനുശോചനം. പരിക്കേറ്റവർ പെട്ടെന്ന് തന്നെ പൂർണ സുഖം പ്രാപിക്കാൻ പ്രാർത്ഥിക്കുന്നു. ഇക്കാര്യത്തിൽ ബന്ധപ്പെട്ട എല്ലാവർക്കും ഞങ്ങളുടെ എംബസി പൂർണ്ണ സഹായം നൽകും.” അദ്ദേഹം പറഞ്ഞു.
കുവൈത്തിലെ ഇന്ത്യൻ എംബസി സ്ഥിതിഗതികൾ സൂക്ഷ്മമായി നിരീക്ഷിച്ചു വരികയാണെന്നും ദുരിതബാധിതരെ സഹായിക്കാൻ അവിടത്തെ അധികാരികളുമായി ചേർന്ന് പ്രവർത്തിക്കുകയാണെന്നും പ്രധാനമന്ത്രി നരേന്ദ്ര മോദി പറഞ്ഞു. “കുവൈത്ത് സിറ്റിയിലുണ്ടായ തീപിടുത്തം ദുഃഖകരമാണ്. എൻ്റെ ചിന്തകൾ അവരുടെ അടുത്തവരും പ്രിയപ്പെട്ടവരുമായ എല്ലാവരുടെയും കൂടെയാണ്. പരിക്കേറ്റവർ എത്രയും വേഗം സുഖം പ്രാപിക്കട്ടെയെന്ന് ഞാൻ പ്രാർത്ഥിക്കുന്നു.” ട്വിറ്റർ എക്സിൽ അദ്ദേഹം കുറിച്ചു.
പരിക്കേറ്റവരെ കൊണ്ടുപോയ മൂന്ന് ആശുപത്രികൾ സ്വൈക സന്ദർശിക്കുകയും ഇന്ത്യൻ അധികാരികളുടെ പൂർണ്ണ പിന്തുണ അവർക്ക് ഉറപ്പുനൽകുകയും ചെയ്തതായി ഇന്ത്യൻ എംബസി എക്സ്-ലെ പോസ്റ്റുകളിൽ പറയുന്നു.
പരിക്കേറ്റ് മുബാറക് അൽ-കബീർ ആശുപത്രിയിലേക്ക് കൊണ്ടുപോയ പതിനൊന്ന് ഇന്ത്യൻ പൗരന്മാരിൽ അവരിൽ 10 പേരെ വൈകുന്നേരത്തോടെ വിട്ടയക്കുമെന്ന് പ്രതീക്ഷിക്കുന്നു. പരിക്കേറ്റ ആറ് പേരെ കൂടി ഫർവാനിയ ആശുപത്രിയിൽ പ്രവേശിപ്പിച്ചു. അവരിൽ നാല് പേരെ പിന്നീട് വിട്ടയച്ചു, ഒരാളെ ജഹ്റ ആശുപത്രിയിലേക്ക് മാറ്റി. പരിക്കേറ്റ 30 ലധികം ഇന്ത്യക്കാരെ അൽ-അദാൻ ആശുപത്രിയിൽ പ്രവേശിപ്പിച്ചു, അവരിൽ ഭൂരിഭാഗവും അപകടനില തരണം ചെയ്തവരാണെന്ന് അധികൃതർ അറിയിച്ചു.
ആവശ്യമായ നടപടികൾക്കും അടിയന്തര വൈദ്യസഹായത്തിനുമായി കുവൈറ്റ് നിയമപാലകരുമായും അഗ്നിശമനസേനയുമായും ആരോഗ്യ അധികാരികളുമായും ബന്ധപ്പെട്ടിട്ടുണ്ടെന്ന് ഇന്ത്യൻ എംബസി എക്സിൽ ഒരു പോസ്റ്റിൽ അറിയിച്ചു.
