ന്യൂഡൽഹി : ഇന്ത്യന് വിമാനങ്ങള്ക്കു നേരെ തുടര്ച്ചയായുണ്ടാകുന്ന ബോംബ് ഭീഷണിയുമായി ബന്ധപ്പെട്ട് ഗതാഗത പാര്ലമെന്ററി സ്റ്റാന്റിങ് കമ്മറ്റി അടിയന്തര യോഗം ചേര്ന്നു. കഴിഞ്ഞ 48 മണിക്കൂറിനുള്ളില് 12 വിമാനങ്ങള്ക്ക് നേരെ വ്യാജ ബോംബ് ഭീഷണി ഉയര്ന്ന പശ്ചാത്തലത്തിലാണ് അടിയന്തര യോഗം. സിവില് ഏവിയേഷന് മന്ത്രി റാം മോഹന് നായിഡുവിന്റെ നേതൃത്വത്തില് നടന്ന യോഗത്തില് വ്യോമയാന മന്ത്രാലയത്തിലേയും ഡയറക്ടറേറ്റ് ജനറല് ഓഫ് സിവില് ഏവിയേഷനിലേയും ഉന്നത ഉദ്യോഗസ്ഥര് പങ്കെടുത്തു.
സംഭവത്തിൽ നിർണായക വിവരം ലഭിച്ചതായും പ്രതികളെന്ന് സംശയിക്കുന്നവരെ തിരിച്ചറിഞ്ഞതായും വ്യോമയാന ഉദ്യോഗസ്ഥരെ ഉദ്ധരിച്ചു റിപ്പോർട്ടുണ്ട്. ബോംബ് ഭീഷണിയെ തുടർന്ന് കേന്ദ്ര ആഭ്യന്തര മന്ത്രാലയം വ്യോമയാന മന്ത്രാലയത്തിൽനിന്ന് റിപ്പോർട്ട് തേടി. സോഷ്യൽ മീഡിയയായ എക്സിലെ പോസ്റ്റിലൂടെയാണ് അജ്ഞാതരുടെ ഭീഷണി സന്ദേശം പുറത്തുവരുന്നത്. ഇതുവരെ ലഭ്യമായ മുഴുവൻ സന്ദേശങ്ങളും വ്യാജമാണെന്ന് കണ്ടെത്തിയിട്ടുണ്ട്.
തിങ്കളാഴ്ചയും രണ്ട് ഇന്ഡിഗോ വിമാനങ്ങള്ക്കും ഒരു എയര് ഇന്ത്യ വിമാനത്തിനും വ്യാജഭീഷണി സന്ദേശം ലഭിച്ചിരുന്നു. ബുധനാഴ്ച ബെംഗളൂരുവിലേക്ക് പുറപ്പെട്ട ആകാശ എയര്, മുംബൈയിലേക്ക് പുറപ്പെട്ട ഇന്ഡിഗോ എന്നിവയ്ക്ക് നേരെയും ബാംബ് ഭീഷണിയുണ്ടായി. തുടര്ന്ന് ഇരുവിമാനങ്ങളും ഡല്ഹിയിലും അഹമ്മദാബാദിലും അടിയന്തര ലാന്ഡിങ് നടത്തി.
