തിരുവന്തപുരം: പ്രമുഖ ഇലക്ട്രിക് സ്കൂട്ടര് നിര്മ്മാതാക്കളുടെ പേരില് വ്യാജ വെബ് സൈറ്റ് നിര്മ്മിച്ച് തട്ടിപ്പ് നടത്തുന്ന സംഘങ്ങള്ക്കെതിരെ മുന്നറിയിപ്പുമായി പോലീസ്. ഒറ്റനോട്ടത്തില് യഥാർത്ഥ കമ്പനിയുടെതാണെന്ന് തോന്നുന്ന തരത്തിലാണ് തട്ടിപ്പുകാര് വ്യാജ വെബ്സൈറ്റുകള് നിര്മ്മിക്കുന്നത്. ഇങ്ങനെ നിർമ്മിക്കുന്ന വെബ്സൈറ്റ് വഴി കുറഞ്ഞ വിലയ്ക്ക് വാഹനങ്ങള് നല്കാമെന്ന് പ്രചരിപ്പിച്ചാണ് വൻ തട്ടിപ്പിന് കളമൊരുക്കുന്നത്.
വ്യാജ ബുക്കിങ് ഓഫറുകള് അടങ്ങിയ പരസ്യങ്ങള് സാമൂഹ്യമാധ്യമങ്ങളിലൂടെ പ്രചരിപ്പിച്ച് ആളുകളെ ആകർഷിക്കും. ഇതിൽ ആകൃഷ്ടരായി വ്യാജവെബ്സൈറ്റിലൂടെ പണം അടച്ച് വാഹനം ബുക്ക് ചെയ്യുന്നതോടെ തുക നഷ്ടപ്പെടും. ഇത്തരം വ്യാജ വെബ്സൈറ്റുകള് തിരിച്ചറിയുന്നതിന് അവയുടെ വിലാസം സൂക്ഷ്മമായി പരിശോധിക്കണം. യഥാര്ഥ വെബ്സൈറ്റില് നിന്ന് ഒന്നോ രണ്ടോ അക്ഷരങ്ങള് തെറ്റിച്ചാകും വ്യാജ വെബ്സൈറ്റുകളുടെ വിലാസം.
വളരെ കുറഞ്ഞ വിലയ്ക്ക് വാഹന ബുക്കിങ് വാഗ്ദാനം ചെയ്യുന്ന വെബ്സൈറ്റുകളുടെ ആധികാരികതയും നിയമസാധുതയും പരിശോധിച്ചുമാത്രമേ ബുക്കിങ് നടപടികളുമായി മുന്നോട്ട് പോകാവൂ. ഇത്തരം തട്ടിപ്പ് ശ്രദ്ധയിപ്പെട്ടാല് ഉടന് തന്നെ 1930 എന്ന നമ്പറില് സൈബര് പൊലീസിനെ അറിയിക്കാനും തയ്യാറാവുക.
