കണ്ണൂര്∙ മുൻ എഡിഎം നവീന് ബാബുവിന്റെ ക്വാർട്ടേഴ്സിന് മുന്നിൽ പരാതിക്കാരനായ പ്രശാന്തന് എത്തിയതിന്റെ സിസിടിവി ദൃശ്യം പുറത്ത്. ഒക്ടോബർ 6ന് ഇരുവരും ക്വാർട്ടേഴ്സിന് മുന്നിലെ റോഡിൽ നിന്ന് സംസാരിക്കുന്ന ദൃശ്യങ്ങളാണ് പുറത്ത് വന്നിരിക്കുന്നത്. പരാതിക്കാരനായ പ്രശാന്തൻ ബൈക്കിലും നവീന് ബാബു നടന്നുമാണ് വരുന്നത്.
പള്ളിക്കരയിലെ ക്വാർട്ടേഴ്സിന്റെ മുന്നിൽ റോഡിൽ വെച്ചാണ് ഇരുവരും കണ്ടുമുട്ടുകയും സംസാരിക്കുകയും ചെയ്തത്. പെട്രോള് പമ്പിന്റെ എന്ഒസി ലഭിക്കാന് പ്രശാന്തൻ, നവീന് ബാബുവിന് 98,500 രൂപ നല്കിയെന്ന് പറയുന്ന ദിവസത്തെ ദൃശ്യങ്ങളാണിത്. എന്നാൽ പണം നല്കിയെന്നതിന് ദൃശ്യത്തിൽ സ്ഥിരീകരണമില്ല.
പെട്രോള് പമ്പിന് അനുമതി നല്കാന് തന്റെ കയ്യില് നിന്നും പണം വാങ്ങിയെന്നായിരുന്നു പരാതിക്കാരനായ പ്രശാന്തൻ ആരോപിച്ചത്. അതേ സമയം, പ്രശാന്തന്റെ പരാതി വ്യാജമാണെന്ന സംശയം പ്രകടിപ്പിക്കുമ്പോഴാണ് ഒക്ടോബർ 6 ന് രണ്ടു പേരും കൂടിക്കാഴ്ച നടത്തിയതിൻ്റെ
സിസിടിവി ദൃശ്യം പുറത്തുവരുന്നത്.
