കൊല്ലം : കൊല്ലത്ത് റെയിൽവെ ട്രാക്കിന് മുകളിൽ മരം വീണ് തീപടർന്നു. കൊല്ലത്തിനും ഇരവിപുരത്തിനും ഇടയിലാണ് സംഭവം. കന്യാകുമാരി പുനലൂർ പാസഞ്ചർ കടന്നുപോകുന്നതിന് തൊട്ടുമുമ്പാണ് അപകടമുണ്ടായത്. വൈദ്യുത ബന്ധം തകരാറിലായതോടെ തിരുവനന്തപുരം – കൊല്ലം പാതയിൽ ട്രെയിൻ ഗതാഗതം തടസ്സപ്പെട്ടു. റെയിൽവെ ട്രാക്കിന് മുകളിലുള്ള വൈദ്യുത ലൈനിലേക്ക് മരം വീണതാണ് തീ പടരാൻ കാരണമായത്.
ഫയർഫോഴ്സ് സ്ഥലത്തെത്തി മരം മുറിച്ചുമാറ്റി. തീ നിയന്ത്രണ വിധേയമാക്കാനും കഴിഞ്ഞു. എങ്കിലും വൈദ്യുതി ബന്ധം പുനഃസ്ഥാപിക്കാൻ കൂടുതൽ സമയം എടുക്കുമെന്നാണ് അധികൃതർ അറിയിച്ചത്. രണ്ട് ട്രാക്കുകളിലെയും വൈദ്യുത ബന്ധം പൂർണ്ണമായി വിച്ഛേദിച്ചിട്ടുണ്ട്.
