കോഴിക്കോട്: മുഖ്യമന്ത്രി പിണറായി വിജയനെതിരെയുള്ള അൻവറിൻ്റെ ആക്രമണ നിലപാട് നേതൃത്വത്തെ തകർക്കാൻ ലക്ഷ്യമിട്ടുള്ളതാണെന്ന് എൽ.ഡി.എഫ് കൺവീനർ ടി.പി. രാമകൃഷ്ണൻ. ഇടതുപക്ഷ ജനാധിപത്യ മുന്നണിയെ പ്രതിനിധീകരിക്കുന്ന ഒരു എംഎൽഎ ഇത്തരം നിലപാടുകൾ സ്വീകരിക്കരുതെന്നും അദ്ദേഹം ഊന്നിപ്പറഞ്ഞു.
മുഖ്യമന്ത്രിക്ക് നൽകിയ പരാതികളുടെ അടിസ്ഥാനത്തിൽ നിരവധി ആരോപണങ്ങളാണ് അൻവർ ഉന്നയിച്ചത്. ആ പരാതിയിൽ ഇപ്പോൾ അന്വേഷണം നടക്കുന്നുണ്ട്, ഇതിൻ്റെ പകർപ്പ് സിപിഐ എമ്മിനും നൽകിയിട്ടുണ്ട്. പാർട്ടി അംഗങ്ങളിൽ നിന്നും പുറത്തുനിന്നുള്ളവരിൽ നിന്നുമാണ് പരാതികൾ വരുന്നതെന്നും അത്തരം പരാതികളോട് പാർട്ടി എപ്പോഴും നീതിപൂർവ്വം പ്രതികരിച്ചിട്ടുണ്ടെന്നും രാമകൃഷ്ണൻ വ്യക്തമാക്കി.
അൻവറിൻ്റെ ആക്രമണങ്ങൾ വിശാലമായ തന്ത്രത്തിൻ്റെ ഭാഗമാണെന്നും യുഡിഎഫും ബിജെപിയും ഉൾപ്പെടെയുള്ള പാർട്ടിയുടെ ശത്രുക്കൾ മാധ്യമ പിന്തുണയോടെ ഇടതു മുന്നണിക്കും സർക്കാരിനുമെതിരെ വ്യാപകമായ പ്രചാരണങ്ങൾ നേരത്തെ നടത്തിയിട്ടുണ്ടെന്നും അദ്ദേഹം അഭിപ്രായപ്പെട്ടു.
ജനങ്ങളുടെ ആവശ്യങ്ങൾ പരിഗണിക്കുന്ന നിലപാടാണ് സർക്കാർ പുലർത്തുന്നത്. മുഖ്യമന്ത്രിയെ ഒറ്റപ്പെടുത്തി ആക്രമിക്കാനുള്ള ശ്രമം പൊതുസമൂഹം തിരിച്ചറിയുമെന്നും രാമകൃഷ്ണൻ പറഞ്ഞു. അൻവറിൻ്റെ ആരോപണങ്ങൾ മുഖ്യമന്ത്രിയുടെ വിശ്വാസ്യതയെ ബാധിക്കുമെന്ന അവകാശവാദങ്ങൾ തള്ളിക്കളഞ്ഞ അദ്ദേഹം, പാർട്ടിയെ പ്രതിനിധീകരിച്ച് സംസാരിക്കാൻ അൻവറിന് എന്ത് യോഗ്യതയുണ്ടെന്നും പാർട്ടിയെ തെറ്റിദ്ധരിപ്പിക്കാനുള്ള ശ്രമങ്ങൾ വെച്ചുപൊറുപ്പിക്കില്ലെന്നും രാമകൃഷ്ണൻ പറഞ്ഞു.
