ഗുരുവായൂർ: തിരുവോണ ആഘോഷത്തിന്റെ ഭാഗമായി ഉത്രാടം കാഴ്ചക്കുല സമർപ്പണം ഇന്ന് പുലർച്ചെ ഗുരുവായൂർ ക്ഷേത്രത്തിൽ ആരംഭിച്ചു. നൂറുകണക്കിനാളുകളാണ് ഉത്രാടം കാഴ്ചക്കുല സമർപ്പണത്തിനായി എത്തിയത്. ഓണക്കാലമായതിനാൽ ക്ഷേത്ര ദർശനത്തിൻ്റെ സമയം ഒരു മണിക്കൂർ വർദ്ധിപ്പിച്ചിട്ടുണ്ട്. ഇന്ന് മുതൽ സെപ്റ്റംബർ 22വരെയാണ് ദർശന സമയം കൂട്ടിയത്. തിരുവോണ ദിനമായ ഞായറാഴ്ച പതിവ് ക്ഷേത്ര ചടങ്ങുകൾക്ക് പുറമെ വിശേഷാൽ കാഴ്ച ശീവേലി മേളവും ഉണ്ടാകും. പുലർച്ചെ നാലരയ്ക്കാണ് ഗുരുവായൂരപ്പന് ഓണപ്പുടവ സമർപ്പിക്കുന്നത്
ഭണ്ഡാരം വരുമാനത്തിൽ ഗുരുവായൂർ ക്ഷേത്രത്തിൽ റെക്കോർഡ് വർദ്ധനവാണ് ഉണ്ടായിട്ടുള്ളത്. 2024 സെപ്റ്റംബർ മാസത്തെ ഭണ്ഡാരം എണ്ണൽ കഴിഞ്ഞ ദിവസം പൂർത്തിയായപ്പോൾ വരുമാനം 5.80 കോടി കവിഞ്ഞു. 58081109 കോടി രൂപയാണ് ഇതുവരെ ലഭിച്ച തുക. സ്വർണവും വെള്ളിയും ഇക്കൂട്ടത്തിലുണ്ട്.
കേന്ദ്ര സർക്കാർ പിൻവലിച്ച 2000 രൂപയുടെ 29 നിരോധിത നോട്ടുകളും നിരോധിച്ച ആയിരം രൂപയുടെ 13 നോട്ടുകളും അഞ്ഞൂറിൻ്റെ 114 കറൻസിയും ലഭിച്ചു. എസ് ഐ ബി ഗുരുവായൂർ ശാഖയ്ക്കാണ് എണ്ണം ചുമതലയുള്ളത്. കിഴക്കേ നട ഇ ഭണ്ഡാരത്തിൽ നിന്ന് 5.39 ലക്ഷം രൂപയും പടിഞ്ഞാറെ നടയിലെ ഇ ഭണ്ഡാരത്തിൽ നിന്ന് 34146 രൂപയും ലഭിച്ചു. ഈ മാസം അവസാനിക്കൻ ദിവസങ്ങൾ ഇനിയും അവശേഷിക്കുന്നതിനാൽ മാസ വരുമാനം വർദ്ധിക്കാനുള്ള സാദ്ധ്യതയാണുള്ളത്.
ഗുരുവായൂർ ക്ഷേത്രത്തിൻ്റെ ചരിത്രത്തിൽ റെക്കോർഡ് വിവാഹങ്ങൾ നടന്ന മാസം കൂടിയാണ് സപ്തംബർ. കഴഞ്ഞ എട്ടാം തിയ്യതി 351 വിവാഹങ്ങളാണ് നടന്നത്. പുലർച്ചെ നാലുമണി മുതൽ ആരംഭിച്ച കല്യാണങ്ങൾ ഏറെ വൈകിയാണ് അവസാനിച്ചത്. തിരക്കും ബുദ്ധിമുട്ടുകളും ഇല്ലാതെയാണ് ഇത്രയും വിവാഹങ്ങൾ ക്ഷേത്രഭാരവാഹികൾ നടത്തിയത്.
ഉത്രാടമായ ഇന്നും തിരുവോണനാളായ നാളെയും ആയിരക്കണക്കിന് ഭക്ഷതർ ക്ഷേത്രത്തിൽ ദർശനം നടത്തും. തിരുവോണ ദിവസമായ നാളെ ശക്തമായ തിരക്കാണ് പ്രതീക്ഷിക്കുന്നത്.
