കൊച്ചി: താരസംഘടനയായ ‘അമ്മ’യുടെ വൈസ് പ്രസിഡന്റ് ജഗദീഷിന് പിന്നാലെ ഹേമാ കമ്മീഷൻ റിപ്പോർട്ടിൽ പിന്തുണയുമായി നടിയും ‘അമ്മ’യുടെ എക്സിക്യൂട്ടീവ് അംഗവുമായ അൻസിബ ഹസൻ. ഹേമ കമ്മീഷൻ റിപ്പോർട്ടിൻ്റെ പേരിൽ ‘അമ്മ’യിൽ ഉടലെടുക്കുന്ന ഭിന്നത മറനീക്കി പുറത്തുവരുകയാണ്. അമ്മ വൈസ് പ്രസിഡന്റ് കൂടിയായ നടൻ ജഗദീഷിനെ പിന്തുണച്ച് കൂടുതൽ പേർ അടുത്ത ദിവസങ്ങളിൽ മുന്നോട്ട് വന്നേക്കും.
സിനിമയിൽ തനിക്ക് മോശം അനുഭവം ഉണ്ടായിട്ടുണ്ടെന്നും നടിയും ബംഗാളി നടിയുടെ ആരോപണത്തിൽ ഒപ്പം നിൽക്കുന്നുവെന്നും തെളിവുണ്ടെങ്കിൽ മുഖം നോക്കാതെ നടപടിയെടുക്കണമെന്നാണ് അൻസിബ ആവശ്യപ്പെട്ടിരിക്കുന്നത്.
കൃത്യമായ തെളിവുണ്ടെങ്കിൽ ആരായാലും നടപടിയെടുക്കണം. ഇരയുടെ കൂടെയുണ്ടാകും. തൊഴിലിടത്ത് തനിക്കും മോശം അനുഭവം ഉണ്ടായിട്ടുണ്ട്. മോശം മെസേജ് അയച്ച ആൾക്ക് നല്ല മറുപടിതന്നെ കൊടുത്തിട്ടുണ്ട്. ആ മറുപടിയിൽ വിഷയം അവസാനിപ്പിച്ചുവെന്നും പരാതിപ്പെടാൻ പോയില്ലെന്നും അൻസിബ പറഞ്ഞു.
ഹേമ കമ്മിറ്റിയിൽ പറയുന്ന കാര്യങ്ങൾ ഒറ്റപ്പെട്ട സംഭവമായി കാണരുതെന്നും സിനിമയിൽ കാസ്റ്റിങ് കൗച്ച് നിലനിൽക്കുന്നുണ്ടെന്നും വേട്ടക്കാരുടെ പേര് പുറത്തുവിടണമെന്നും ജഗദീഷ് പ്രതികരിച്ചിരുന്നു
