[ Photo Courtesy : Reuters/X]
ബ്യൂനസ് ഐറിസ് : 2026 ലോകകപ്പിനുള്ള സൗത്ത് അമേരിക്കൻ യോഗ്യത മത്സരത്തിൽ ഹാട്രിക്കുമായി മെസ്സി തിളങ്ങിയപ്പോൾ ബൊളീവിയക്കെതിരെ അർജന്റീനയ്ക്ക് മിന്നും ജയം. മറുപടിയില്ലാത്ത ആറു ഗോളുകൾക്കാണ് അർജന്റീനയുടെ തകർപ്പൻ ജയം. ഹാട്രിക്കും രണ്ടു ഗോളുകൾക്ക് അസിസ്റ്റ് നൽകിയും സൂപ്പർ താരം ലയണൽ മെസ്സിയാണ് അർജന്റീനയുടെ മികച്ച വിജയത്തിനു വഴിയൊരുക്കിയത്. ജൂലൈയിലെ കോപ്പ അമേരിക്കയ്ക്കു ശേഷം പരുക്കു മാറി തിരിച്ചെത്തിയ മെസ്സിയുടെ രണ്ടാമത്തെ രാജ്യാന്തര മത്സരമാണിത്.
ആദ്യ പകുതിയിൽ 19–ാം മിനിറ്റിലും, രണ്ടാം പകുതിയിൽ 84′, 86′ മിനിറ്റുകളിലുമായിരുന്നു മെസ്സിയുടെ ബൂട്ടിൽ നിന്നും ഹാട്രിക്ക് തികച്ച ഗോളുകൾ പിറന്നത്. 43–ാം മിനിറ്റിൽ ലൗട്ടൗരോ മാർട്ടിനസ്സിൻ്റേയും 43+5′ മിനിറ്റിൽ യൂലിയൻ അൽവാരസിൻ്റേയും ഗോളുകൾക്ക് അസിസ്റ്റ് നൽകിയതും മെസ്സിയായിരുന്നു. 70–ാം മിനിറ്റിൽ അൽമാഡയുടെ വകയായിരുന്നു അർജന്റീനയുടെ മറ്റൊരു ഗോൾ.
