ന്യൂഡൽഹി : അഹമ്മദാബാദിലുണ്ടായ വിമാനപകടത്തിൽ
ദുഃഖം രേഖപ്പെടുത്തി പ്രധാനമന്ത്രി നരേന്ദ്ര മോദി. എക്സിലെ ഒരു പോസ്റ്റിലാണ് പ്രധാനമന്ത്രി മോദി തൻ്റെയും രാഷ്ട്രത്തിൻ്റേയും ദുഃഖം പങ്കുവെച്ചത്.
വാക്കുകൾക്ക് അതീതമായ ഹൃദയഭേദകം എന്നാണ് അദ്ദേഹം സംഭവത്തെ വിശേഷിപ്പിച്ചത്. ഒപ്പം ദു:ഖമനുഭവിക്കുന്നവർക്ക് അനുശോചനം അറിയിക്കുകയും ചെയ്തു.
സർദാർ വല്ലഭായ് പട്ടേൽ അന്താരാഷ്ട്ര വിമാനത്താവളത്തിൽ നിന്ന് പറന്നുയർന്ന് നിമിഷങ്ങൾക്കുള്ളിലാണ് എയർ ഇന്ത്യ വിമാനം AI171 തകർന്നുവീണത്. അപകടത്തിൽപ്പെട്ട എയർ ഇന്ത്യ വിമാനത്തിൽ മുൻ ഗുജറാത്ത് മുഖ്യമന്ത്രി വിജയ് രൂപാണിയും ഉൾപ്പെട്ടിരുന്നു. ലണ്ടനിലേക്ക് പോകുകയായിരുന്ന എയർ ഇന്ത്യ ബോയിംഗ് 787-8 ഡ്രീംലൈനർ വിമാനത്തിൽ 230 യാത്രക്കാരും 12 ക്രൂ അംഗങ്ങളും ഉൾപ്പെടെ 242 പേരാണ് ഉണ്ടായിരുന്നത്.
