കൊച്ചി : കൊച്ചിയിൽ ഗതാഗത നിയമം ലംഘിച്ച് എയര്ഹോണുകള് ഘടിപ്പിച്ച വാഹനങ്ങള്ക്കെതിരെ കർശന നടപടിയുമായി മോട്ടോര് വാഹന വകുപ്പ്. കൊച്ചിയിൽ രാവിലെ മുതൽ വ്യാപക പരിശോധനയാണ് നടക്കുന്നത്. അന്തര് സംസ്ഥാന വാഹനങ്ങളടക്കം പരിശോധനക്ക് വിധേയമാക്കുന്നുണ്ട്. നിരവധി അന്തര് സംസ്ഥാന ബസുകളിൽ നിന്ന് എയര്ഹോണുകള് പിടിച്ചെടുത്തു. വാഹനങ്ങളിൽ നിന്ന് പിടിച്ചെടുത്ത എയര്ഹോണുകള് റോഡ് റോളര് ഉപയോഗിച്ച് നശിപ്പിക്കുന്നതിന്റെ ദൃശ്യങ്ങളും പുറത്തുവന്നിട്ടുണ്ട്
എയര്ഹോണുകള്ക്കെതിരെ നടപടിയെടുക്കാൻ പ്രത്യേക പരിശോധന നടത്തണമെന്നും പിടിച്ചെടുക്കുന്ന എയര്ഹോണുകള് റോഡ് റോളര് ഉപയോഗിച്ച് തകര്ക്കണമെന്നും മാധ്യമങ്ങള്ക്ക് മുന്നിൽ പ്രദര്ശിപ്പിക്കണമെന്നുമായിരുന്നു ഗതാഗത മന്ത്രി കെ ബി ഗണേഷ്കുമാറിന്റെ നിര്ദ്ദേശം. കഴിഞ്ഞ ദിവസങ്ങളിൽ സംസ്ഥാനത്തെ വിവിധയിടങ്ങളിൽ എയര്ഹോണുകള്ക്കെതിരെ പരിശോധന നടന്നിരുന്നു. വ്യാപകമായി എയര്ഹോണുകള് പിടിച്ചെടുക്കുകയും ചെയ്തിരുന്നു.
