ന്യൂഡൽഹി: ഹേമ കമ്മിറ്റി റിപ്പോർട്ട് പുറത്ത് വന്നതിന് പിന്നാലെ മലയാള സിനിമ താരങ്ങളുടെ സംഘടനയായ അമ്മയുടെ അധ്യക്ഷസ്ഥാനം രാജിവെച്ച് ഭരണസമിതി പിരിച്ചുവിട്ട മോഹൻലാലിനെതിരെ നിശിതമായ വിമർശനം ഉന്നയിച്ച് എഴുത്തുകാരിയും കോളമിസ്റ്റുമായ ശോഭ ഡേ. ആണുങ്ങളെ പോലെ നിവർന്ന് നിന്ന് നിങ്ങളുടെ സഹ മെമ്പർമാരോട് ഹേമ കമ്മിറ്റി റിപ്പോർട്ടിലെ പരാമർശങ്ങളുടെ ഉത്തരവാദിത്തമേറ്റെടുക്കാൻ പറയണമെന്നും ശോഭ ഡേ അഭ്യർത്ഥിച്ചു. അതിജീവിതകൾക്ക് വേണ്ട സഹായം നൽകാനും അവർക്ക് കൃത്യമായ മാർഗ്ഗനിർദ്ദേശം കൊടുക്കണമെന്നും ശോഭ ഡെ എൻ.ഡി.ടി.വിയോടുള്ള പ്രതികരണത്തിൽ പറഞ്ഞു.
ഹേമ കമ്മീഷൻ റിപ്പോർട്ട്അ ഞ്ച് വർഷമായി ഒരു നടപടിക്കും വിധേയമായില്ലെന്നത് മോശം കാര്യമാണ്. 2017ൽ ഒരു വിഭാഗം സ്ത്രീകൾ പ്രതിഷേധവുമായി രംഗത്തെത്തിയതോടെയാണ് മലയാള സിനിമയിൽ മാറ്റങ്ങളുണ്ടായതെന്നും ശോഭ ഡെ പറഞ്ഞു.
2017ൽ മലയാള നടി ബലാത്സംഗത്തിനിരയായ സംഭവമുണ്ടായി. എന്നാൽ, ഇത് മലയാള സിനിമയുടെ മാത്രം പ്രശ്നമല്ല. ഇന്ത്യയിലെ വിവിധ സിനിമ വ്യവസായ മേഖലകളിൽ ഈ പ്രശ്നമുണ്ട്. ബോളിവുഡ്, ബംഗാളി സിനിമ, കർണാടക എന്നിവടങ്ങളിലെല്ലാം സ്ത്രീകൾ പ്രശ്നങ്ങൾ നേരിടുന്നുണ്ടെന്നും അവർ പറഞ്ഞു.
15 മുതൽ 20 വരെ താരങ്ങൾ നിയന്ത്രിക്കുന്ന ക്ലബാണ് മലയാള സിനിമയെന്ന് ഗുരുതര ആരോപണം ഉന്നയിച്ചതിനോടൊപ്പം നീതിയുടെ ഭാഗത്ത് നിൽക്കുകയാണ് നല്ല നേതൃത്വം ചെയ്യേണ്ടതെന്നും . സ്‍ത്രീകൾക്കെതിരെ അതിക്രമം നടത്തുന്നവർക്കെതിരെ അമ്മ നേതൃത്വം നടപടിയെടുക്കണമായിരുന്നു എന്നും അവർ ചൂണ്ടിക്കാട്ടി
