ന്യൂഡൽഹി : സെബി ചെയർപേഴ്സൺ മാധബി ബുച്ചിനെതിരെ യുഎസ് ഷോർട്ട് സെല്ലർ ഹിൻഡൻബർഗ് റിസർച്ച് നടത്തിയ പുതിയ ആരോപണങ്ങളിൽ പ്രതികരണവുമായി രാഹുൽ ഗാന്ധി.
ചെറുകിട റീട്ടെയിൽ നിക്ഷേപകരുടെ സമ്പത്ത് സംരക്ഷിക്കാൻ ചുമതലപ്പെടുത്തിയ സെബിയുടെ സമഗ്രത അതിൻ്റെ ചെയർപേഴ്സണെതിരായ ആരോപണങ്ങളാൽ ഗുരുതരമായി വിട്ടുവീഴ്ച ചെയ്യപ്പെടുകയാണെന്ന് എക്സിൽ പോസ്റ്റ് ചെയ്ത വീഡിയോ സന്ദേശത്തിൽ രാഹുൽ ഗാന്ധി
ആരോപണങ്ങൾക്കെതിരെ സംയുക്ത പാർലമെൻ്ററി സമിതി (ജെപിസി) അന്വേഷണത്തെ പ്രധാനമന്ത്രി നരേന്ദ്ര മോദി ഭയപ്പെടുന്നത് എന്തുകൊണ്ടാണെന്ന് യുഎസ് ഷോർട്ട് സെല്ലർ സ്ഥാപനത്തിൻ്റെ സമീപകാല റിപ്പോർട്ട് വ്യക്തമാക്കുന്നുവെന്നും രാഹുൽ ഗാന്ധി കൂട്ടിച്ചേർത്തു.
ശനിയാഴ്ച രാത്രിയാണ് ഹിൻഡൻബർഗ് റിസർച്ച് ഒരു പുതിയ റിപ്പോർട്ട് പുറത്തുവിട്ടത്. അദാനി ഗ്രൂപ്പിനെതിരെ പ്രവർത്തിക്കാൻ സെബി തയ്യാറാകാത്തത് അതിൻ്റെ ചെയർപേഴ്സൺ മാധബി ബുച്ചിന് ഓഫ്ഷോർ ഫണ്ടുകളിൽ ഓഹരി പങ്കാളിത്തമുള്ളതുകൊണ്ടാകാമെന്ന് സംശയിക്കുന്നു എന്നതായിരുന്നു ആരോപണം.
“രാജ്യത്തുടനീളമുള്ള സത്യസന്ധരായ നിക്ഷേപകർ സർക്കാരിനോട് ആവശ്യപ്പെടുന്ന ചോദ്യങ്ങളുണ്ട്: എന്തുകൊണ്ടാണ് സെബി ചെയർപേഴ്സൺ മാധബി പുരി ബുച്ച് ഇതുവരെ രാജിവയ്ക്കാത്തത്? നിക്ഷേപകർക്ക് അവരുടെ അധ്വാനിച്ച പണം നഷ്ടപ്പെട്ടാൽ, ആരാണ് ഉത്തരവാദികൾ? പ്രധാനമന്ത്രി മോദി, സെബി ചെയർപേഴ്സൺ, അല്ലെങ്കിൽ ഗൗതം അദാനി. പുതിയതും ഗുരുതരവുമായ ആരോപണങ്ങളുടെ വെളിച്ചത്തിൽ, സുപ്രീം കോടതി ഇക്കാര്യം ഒരിക്കൽ കൂടി സ്വമേധയാ പരിശോധിക്കുമോ?” ഇങ്ങനെ ഒരു പിടി ചോദ്യങ്ങളാണ് രാഹുൽ ഗാന്ധി വീഡിയോയിലൂടെ ഉന്നയിക്കുന്നത്.
ബർമുഡയിലും മൗറീഷ്യസിലും ആസ്ഥാനമായുള്ള ഓഫ്ഷോർ ഫണ്ടുകളിൽ മാധബിയും അവരുടെ ഭർത്താവും രഹസ്യമായി നിക്ഷേപം നടത്തിയെന്ന് ഹിൻഡൻബർഗ് റിസർച്ച് ആരോപിച്ചു. ഈ ഫണ്ടുകൾ തന്നെയാണ് അദാനി ഗ്രൂപ്പ് ചെയർമാൻ ഗൗതം അദാനിയുടെ സഹോദരൻ വിനോദ് അദാനി, റൗണ്ട് ട്രിപ്പിംഗ് ഫണ്ടുകൾ വഴി സ്റ്റോക്ക് വില വർദ്ധിപ്പിക്കാൻ ഉപയോഗിച്ചതെന്ന് പറയപ്പെടുന്നു.
