തൃശൂര്: വയനാട് മണ്ഡലം ലോകസഭയിലേക്കും ചേലക്കര മണ്ഡലം നിയമസഭയിലേക്കും ഇന്ന് ജനവിധി തേടും. രാവിലെ ഏഴുമുതല് വൈകിട്ട് ആറുവരെയാണ് പോളിങ്.
ചേലക്കരയിലെ എല്ഡിഎഫ് സ്ഥാനാര്ത്ഥി യു ആര് പ്രദീപ് രാവിലെ തന്നെ കൊണ്ടയൂര് വിദ്യാസാഗര് ഗുരുകുലം സ്കൂളിലെ 25-ാം നമ്പര് ബൂത്തില് വോട്ട് ചെയ്തു. യുഡിഎഫ് സ്ഥാനാര്ഥി രമ്യ ഹരിദാസിന് മണ്ഡലത്തില് വോട്ടില്ല. ബിജെപി സ്ഥാനാര്ഥി കെ ബാലകൃഷ്ണന് പാമ്പാടി സ്കൂളിലെ 116–ാം നമ്പര് ബൂത്തിലാണ് വോട്ട്.
ചേലക്കരയില് 2,13,103 വോട്ടര്മാരാണുള്ളതെന്ന് തപോഷ് ബസുമതാരി അറിയിച്ചു. അന്തര് സംസ്ഥാന സേനയും അന്തര് ജില്ലാ സേനയും തെരഞ്ഞെടുപ്പ് സുരക്ഷാ ക്രമീകരണത്തിന്റെ ഭാഗമായി ജില്ലയിലെത്തും. കൂടാതെ സംസ്ഥാന, ജില്ലാ അതിര്ത്തികളിലും പ്രത്യേക പൊലീസ് പരിശോധന നടക്കുന്നുണ്ട്. സ്ട്രോങ് റൂമിനടക്കം പ്രത്യേക സുരക്ഷയൊരുക്കും. എന്സിസി, എസ്പിസി തുടങ്ങി 2700 പൊലീസ് അധിക സേനയും ജില്ലയിലുണ്ടാകും. ചേലക്കരയില് തൃശ്ശൂര് സിറ്റി ജില്ലാ പൊലീസ് മേധാവിക്ക് കീഴില് കേരള പോലീസിന്റെ 600 ലധികം പൊലീസ് ഉദ്യോഗസ്ഥരെയും ഒരു കമ്പനി കേന്ദ്ര സേനയേയുമാണ് വിന്യസിക്കുന്നത്. മണ്ഡലത്തില് പ്രശ്നസാദ്ധ്യതാ ബൂത്തുകള് സ്ഥിതി ചെയ്യുന്ന പ്രദേശത്ത് നാല് സിഎപിഎഫ് ഉദ്യോഗസ്ഥരെ വിന്യസിക്കും. മറ്റു ബൂത്തുകളില് രണ്ട് പോലീസുകാരെയും വിന്യസിക്കും. ഇതിന് പുറമെ ബൂത്തുകളുടെ എണ്ണം തിരിച്ച് ഗ്രൂപ്പ് പട്രോളിങ്, ക്രമസമാധാന പട്രോളിങ്, ക്വിക്ക് റിയാക്ഷന് പട്രോളിങും നടത്തും.
വയനാട്ടിലും ചേലക്കരയിലും ഡ്രൈ ഡേ നിലവില് വന്നു. 13 ന് വോട്ടെടുപ്പ് ജോലികള് പൂര്ത്തിയാകുന്നതുവരെ ഡ്രൈ ഡേ ആയിരിക്കും. ഈ സമയത്ത് മണ്ഡലത്തിലെ സര്ക്കാര്, സ്വകാര്യ സ്ഥാപനങ്ങളിലോ, സ്ഥലത്തോ യാതൊരുവിധ ലഹരി പദാര്ത്ഥങ്ങള് വില്ക്കാനോ വിതരണം ചെയ്യാനോ സംഭരിക്കാനോ പാടില്ല. മദ്യ ഷാപ്പുകള്, ഹോട്ടലുകള്, റസ്റ്റൊറന്റുകള്, ക്ലബുകള്, അനുബന്ധമായി പ്രവര്ത്തിക്കുന്ന മറ്റ് സ്ഥാപനങ്ങള് എന്നിവയും ഈ ദിനങ്ങളില് പ്രവര്ത്തിക്കരുതെന്ന് ജില്ലാ കലക്ടര്മാര് അറിയിച്ചു.
പോളിങ് ബൂത്തിലെത്തുന്നവര് നിര്ബന്ധമായും തിരിച്ചറിയല് രേഖ കൈവശം കരുതണം. വോട്ടര് ഐഡി കാര്ഡ്, ആധാര് കാര്ഡ്, പാന് കാര്ഡ്, ഡ്രൈവിങ് ലൈസന്സ്, പാസ്പോര്ട്ട്, സര്വീസ് ഐഡന്റിറ്റി കാര്ഡ്, ബാങ്കിന്റെയോ പോസ്റ്റ് ഓഫീസിന്റെയോ ഫോട്ടോ പതിപ്പിച്ച പാസ്ബുക്ക്, തൊഴില്മന്ത്രാലയത്തിന്റെ ഹെല്ത്ത് ഇന്ഷുറന്സ് സ്മാര്ട്ട് കാര്ഡ്, ഫോട്ടോ പതിപ്പിച്ച പെന്ഷന് കാര്ഡ്, എന്പിആര് സ്കീമിന് കീഴില് ആര്ജിഐ നല്കിയ സ്മാര്ട്ട് കാര്ഡ്, എംപി/എംഎല്എ അനുവദിച്ച ഔദ്യോഗിക തിരിച്ചറിയല് കാര്ഡ്, ദേശീയ തൊഴിലുറപ്പ് പദ്ധതി ജോബ് കാര്ഡ് എന്നിവയില് ഏതെങ്കിലുമൊരു അംഗീകൃത തിരിച്ചറിയല് രേഖ കൈയിലുണ്ടെങ്കില് വോട്ട് ചെയ്യാന് കഴിയും.
