തിരുവല്ല : തിരുവല്ല നഗരസഭയില് റീല്സില് അഭിനയിച്ച ജീവനക്കാരെ പിന്തുണച്ച് ദുരന്തനിവാരണ വിദഗ്ദ്ധന് മുരളി തുമ്മാരുകുടി. ഇവരെ കാരണം കാണിക്കല് കൊടുത്തു വിരട്ടുകയല്ല, മറിച്ച് സര്ക്കാര് ഓഫീസിന്റെ പുതിയ മുഖം ജനങ്ങളെ കാണിക്കുന്ന തരത്തില് പ്രോത്സാഹിപ്പിക്കുകയാണ് വേണ്ടതെന്ന് മുരളി തുമ്മാരുകുടി ഫേസ് ബുക്കില് കുറിച്ചു. ഓഫീസിനുള്ളില് റീല്സ് ചിത്രീകരിച്ച നഗരസഭയിലെ എട്ട് ജീവനക്കാര്ക്ക് നഗരസഭാ സെക്രട്ടറി കാരണം കാണിക്കല് നോട്ടീസ് നല്കിയിരുന്നു. ‘ദേവദൂതന്’ സിനിമയിലെ പാട്ടില് അഭിനയിച്ചാണ് റീല്സ് നിര്മ്മിച്ചത്. മാറുന്ന ഓഫീസുകള്, മാറേണ്ട നിയമങ്ങള് എന്നാണ് മുരളി തുമ്മാരുകുടി അഭിപ്രായപെട്ടത്.
മുരളി തുമ്മാരുകുടിയുടെ ഫേസ് ബുക്ക പോസ്റ്റിന്റെ പൂർണ രൂപം:
മാറുന്ന ഓഫീസുകൾ, മാറേണ്ട നിയമങ്ങൾ
നമ്മുടെ ഏറെ സർക്കാർ ഓഫീസുകളിൽ, വില്ലേജ് ഓഫീസ് തൊട്ട് കളക്ടറേറ്റ് വരെ, പഴയ കാലത്തെ അപേക്ഷിച്ച് വലിയ മാറ്റങ്ങൾ ഉണ്ട്. കെട്ടിടങ്ങളിലും കമ്പ്യൂട്ടറിലും മാത്രമല്ല സംവിധാനങ്ങളിലും ചെരുമാറ്റത്തിലും മാറ്റങ്ങൾ ഉണ്ട്.
ഇതിന് ഒരു പ്രധാന കാരണം യുവാക്കൾ ഏറെ സർക്കാർ സർവ്വീസിൽ എത്തുമ്പോൾ ഉണ്ടാകുന്ന തലമുറ മാറ്റമാണ്. കളക്ടർ പദവിയെ ജനകീയമാക്കിയ Prasanth N ബ്രോ ഉത്തമ ഉദാഹരണമാണ്.
പുതിയ തലമുറ തൊഴിൽ സ്ഥലത്ത് അല്പം ക്രിയേറ്റീവിറ്റി ഒക്കെ കാണിക്കുന്നത് നല്ല കാര്യമാണ്. വെളിച്ചം കയറാതെ, ഫയലുകൾ കെട്ടിക്കിടക്കുന്ന, ഒന്നു ചിരിക്കുക പോലും ചെയ്യാതെ ജനങ്ങളോട് യുദ്ധം ചെയ്യുന്ന ആളുകൾ മാത്രം തൊഴിലെടുക്കുന്ന സ്ഥലമാണെന്നുള്ള സ്റ്റീരിയോ ടൈപ്പ് മാറാൻ എങ്കിലും ഇത് ഉപകരിക്കും
ഇവരെ കാരണം കാണിക്കൽ നോട്ടീസ് കൊടുത്തു വിരട്ടുകയല്ല മറിച്ച് സർക്കാർ ഓഫീസിൻ്റെ പുതിയമുഖം ജനങ്ങളെ കാണിക്കുന്ന താരങ്ങൾ ആയി പ്രോത്സാഹിപ്പിക്കുകയാണ് വേണ്ടത്.
മുരളി തുമ്മാരുകുടി
