ഗുരുവായൂര് : നടി മീരാനന്ദന് വിവാഹിതയായി. ഗുരുവായൂര് ക്ഷേത്രത്തില് വെച്ചായിരുന്നു വിവാഹം. ലണ്ടനില് അക്കൗണ്ടന്റ് ആയ ശ്രീജു ആണ് വരന്. ഇന്ന് പുലര്ച്ചെയായിരുന്നു വിവാഹം. താലികെട്ടിന്റെയും സിന്ദൂരം ചാര്ത്തുന്നതിന്റെയും ചിത്രങ്ങള് മീര സോഷ്യല് മീഡിയയില് പങ്കുവെച്ചു.
കഴിഞ്ഞ സെപ്റ്റംബര് 13 ന് ആയിരുന്നു താരത്തിന്റെ വിവാഹനിശ്ചയം. മാട്രിമോണി സൈറ്റ് വഴിയാണ് മീരയും ശ്രീജുവും പരിചയപ്പെട്ടത്. ശേഷം ഇരുവരുടേയും മാതാപിതാക്കള് പരസ്പരം സംസാരിച്ച് വിവാഹം ഉറപ്പിക്കുകയായിരുന്നു. കൊച്ചി എളമക്കര സ്വദേശിനിയായ മീരാനന്ദന് ലാല്ജോസിന്റെ ‘മുല്ല’ എന്ന ചിത്രത്തിലൂടെയാണ് അഭിനയരംഗത്തേക്ക് കടന്നുവന്നത്.
2008 ലാണ് മുല്ല റിലീസായത്. തൊട്ടടുത്ത വര്ഷം ‘വാല്മീകി’ എന്ന ചിത്രത്തിലൂടെ തമിഴിലും 2011ല് ‘ജയ് ബോലോ തെലങ്കാന’ എന്ന ചിത്രത്തിലൂടെ തെലുങ്കിലും 2014 ല് ‘കരോട്പതി’ എന്ന ചിത്രത്തിലൂടെ കന്നഡയിലും അരങ്ങേറി
പുതിയ മുഖം, പോത്തന് വാവ, എല്സമ്മ എന്ന ആണ്കുട്ടി, അപ്പോത്തിക്കിരി തുടങ്ങിയവയാണ് ശ്രദ്ധേയ ചിത്രങ്ങള്. നിലവില് ദുബായില് നിന്നുള്ള മലയാളം റേഡിയോ സ്റ്റേഷന് ഗോള്ഡ് 101.3 എഫ്എമ്മില് ആര്ജെയാണ്. ‘എന്നാലും എന്റളിയാ’ എന്നതാണ് മീരയുടെതായി അവസാനം റിലീസ് ചെയ്ത ചിത്രം.
