[Photo Courtesy : X]
ബംഗളൂരു : ബംഗളൂരു നഗരം കനത്ത ചൂടിൽ ഉരുകുകയാണ്. പകൽ സമയത്തെ താപനില കുത്തനെ ഉയർന്നു കൊണ്ടിരിക്കുകയാണെന്നാണ് റിപ്പോർട്ട്. നഗരത്തിൽ നിലവിൽ താപനില 35.6 ഡിഗ്രി സെൽഷ്യസാണ്. വരുംദിവസങ്ങളിൽ ഇത് ഉയർന്ന് 40 ഡിഗ്രി എത്തുമെന്നാണ് കേന്ദ്ര കാലാവസ്ഥാ വകുപ്പ് പ്രവചിക്കുന്നത്.
കർണാടകത്തിൽ ഏറ്റവും കൂടുതൽ താപനില രേഖപ്പെടുത്തിയത് വടക്കൻ കർണാടകയിലാണ്. ഇവിടെ ഏതാണ്ട് ഉഷ്ണതരംഗസമാനമായ ചൂട് അനുഭവപ്പെട്ടു തുടങ്ങി. കാലബുറഗിയിൽ 39.5 ഡിഗ്രി സെൽഷ്യസ് ചൂടാണ് തിങ്കളാഴ്ച അനുഭവപ്പെട്ടത്. റായ്തൂർ, യാദ്ഗിർ എന്നിവിടങ്ങളിൽ 38.7 ഡിഗ്രിയാണ് ചൂട്. ബല്ലാരി, ബാഗൽകോട്ട് എന്നിവിടങ്ങളിൽ 38.2 ഡിഗ്രി വരെ താപനില എത്തി.
നിലവിൽ ഉഷ്ണതരംഗം ഇല്ലെങ്കിലും വരുംനാളുകളിൽ വടക്കൻ കർണാടകത്തിലും തീരമേഖലയിലും ഉഷ്ണതരംഗം അനുഭവപ്പെടാൻ സാദ്ധ്യത കൽപ്പിക്കുന്നു. അതേസമയം, ബംഗളൂരു, ചിത്രദുർഗ തുടങ്ങിയ ഡെക്കാൻ മേഖലയിലെ നഗരങ്ങളിൽ പ്രഭാതങ്ങളില് കാര്യമായ ചൂടില്ല.
