തിരുവനന്തപുരം : കഴക്കൂട്ടത്ത് ഹോസ്റ്റലില് കയറി ഐടി ജീവനക്കാരിയായ യുവതിയെ പീഡിപ്പിക്കാൻ ശ്രമിച്ച പ്രതി പിടിയില്. തമിഴ്നാട്ടിലെ മധുരയിൽ നിന്നാണ് അന്വേഷണ സംഘം ഇയാളെ പിടികൂടിയത്. തമിഴ്നാട് സ്വദേശിയായ ട്രക്ക് ഡ്രൈവറാണ് പ്രതിയെന്ന് പോലീസ് പറഞ്ഞു. വ്യാഴാഴ്ച രാത്രിയാണ് യുവതിക്ക് നേരെ അതിക്രമ ശ്രമം നടന്നത്.
യുവതിയുടെ പരാതിയെ തുടർന്ന് അന്വേഷണത്തിനായി അസിസ്റ്റന്റ് കമ്മീഷണറുടെ നേതൃത്വത്തില് പ്രത്യേക അന്വേഷണ സംഘത്തിന് രൂപം നല്കിയിരുന്നു. യുവതി നല്കിയ വിവരങ്ങളും സിസിടിവി ദൃശ്യങ്ങളും കേന്ദ്രീകരിച്ച് നടത്തിയ അന്വേഷണത്തിലാണ് പ്രതിയെക്കുറിച്ച് സൂചന ലഭിച്ചത്. തിരിച്ചറിയല് പരേഡ അടക്കം നടത്താനുള്ളതിനാല് പ്രതിയുടെ പേര് വിവരങ്ങള് പോലീസ് പുറത്തു വിട്ടിട്ടില്ല.
ഹോസ്റ്റലിലെ ഒരു മുറിയില് തനിച്ച് താമസിച്ചിരുന്ന യുവതിയായിരുന്നു ആക്രമിക്കപ്പെട്ടത്. മുറിക്കുള്ളില് അതിക്രമിച്ച് കയറിയാണ് പ്രതി യുവതിയെ ലൈംഗികമായി പീഡിപ്പിക്കാന് ശ്രമിച്ചത്. ഞെട്ടി ഉണര്ന്ന ശേഷം പ്രതിയെ പെണ്കുട്ടി തള്ളി മാറ്റുകയായിരുന്നു. പിന്നാലെ ഇയാള് ഇറങ്ങി ഓടിയെന്നും യുവതി നൽകിയ പരാതിയില് പറയുന്നു.
