പാലക്കാട് : നടി മീനഗണേഷ് അന്തരിച്ചു. 81 വയസായിരുന്നു. വാർദ്ധക്യസഹജമായ അസുഖത്തെതുടർന്ന് ഷൊർണൂരിലെ സ്വകാര്യ ആശുപത്രിയിൽ ചികിത്സയിലായിരുന്നു. ഇന്ന് പുലർച്ചെയായിരുന്നു അന്ത്യം. നൂറിലേറെ മലയാള സിനിമകളിലും ഒട്ടേറെ സീരിയലുകളിലും നാടകങ്ങളിലും അഭിനയിച്ചിട്ടുണ്ട്.
1976 മുതൽ സിനിമ സീരിയൽ രംഗത്ത് സജീവമായിരുന്ന മീന ഗണേഷ്
വാസന്തിയും, ലക്ഷ്മിയും, പിന്നെ ഞാനും കരുമാടിക്കുട്ടൻ, നന്ദനം എന്നീ ചിത്രങ്ങളിലൂടെയാണ് പ്രേക്ഷക ശ്രദ്ധ പിടിച്ചു പറ്റിയത്. പത്തൊന്പതാമത്തെ വയസില് നാടക രംഗത്തിലൂടെയാണ് മീന ഗണേഷ് അഭിനയ രംഗത്ത് എത്തുന്നത്. നാടക രംഗത്ത് എസ്എൽ പുരം സൂര്യ സോമ, കായംകുളം കേരള തിയറ്റേഴ്സ്, തൃശൂർ ചിന്മയി തുടങ്ങി കേരളത്തിലെ വിവിധ നാടക സമിതികളിൽ പ്രവര്ത്തിച്ചിട്ടുണ്ട്. നിരവധി പുരസ്കാരങ്ങളും നേടിയിരുന്നു.
ആദ്യ സിനിമ പിഎ ബക്കറിന്റെ മണി മുഴക്കം ആയിരുന്നു. നാടക രംഗത്തെ പരിചയമാണ് എഎന് ഗണേഷുമായുള്ള വിവാഹത്തില് എത്തിയത്. സംവിധായകന് മനോജ് ഗണേഷ്, സംഗീത എന്നിവര് മക്കളാണ്. സംസ്കാരം വൈകീട്ട് ഷോര്ണൂര് ശാന്തി തീരത്ത് നടക്കും.
