തിരുവനന്തപുരം : വട്ടിയൂർക്കാവ് എംഎൽഎ വി കെ പ്രശാന്തിൻ്റെ വാഹനം വഴിയിൽ തടഞ്ഞ തിരുവനന്തപുരം കോർപ്പറേഷൻ കൗൺസിലർക്കെതിരെ കേസെടുത്ത് വട്ടിയൂർക്കാവ് പോലീസ്. കൗൺസിലർ സുഗതനെതിരെയാണ് കേസെടുത്തത്. വാഴോട്ടുകോണത്ത് നടന്ന ഒരു ഉദ്ഘാടന പരിപാടിയിൽ ക്ഷണിക്കാത്തതിനെ തുടർന്നായിരുന്നു സുഗതൻ്റെ വഴിതടയൽ. കഴിഞ്ഞ ദിവസമാണ് സംഭവം ഉണ്ടായത്.
വാഴോട്ടുകോണത്ത് ആരോഗ്യമന്ത്രി വീണാ ജോർജ് ഉദ്ഘാടനം നിർവ്വഹിക്കേണ്ടിയിരുന്ന മഹിളാമന്ദിരം കെട്ടിടം മന്ത്രിയുടെ അസാന്നിദ്ധ്യത്തിൽ എംഎൽഎ വി കെ പ്രശാന്ത് ആണ് ഉദ്ഘാടനം ചെയ്തത്. ഈ ചടങ്ങിലേയ്ക്ക് ക്ഷണിച്ചില്ല എന്നാരോപിച്ചാണ് വാഴോട്ടുകോണം കൗൺസിലറായ സുഗതൻ പ്രതിഷേധിക്കുകയും എംഎൽഎയുടെ കാർ തടയുകയും ചെയ്തത്. വേദിയിലിരുന്നവരെയും മൈക്ക് ഓപറേറ്റർമാരെയും ഭീഷണിപ്പെടുത്തുകയും ചെയ്തിരുന്നു. വി കെ പ്രശാന്ത് എംഎൽഎ നൽകിയ പരാതിയിലാണ് പോലീസ് കേസെടുത്തത്.
