ഷാർജ : ഷാർജയിൽ ദുരിതത്തിൽ പെട്ടുപോയ മലയാളി യുവതിക്ക് തുണയായി പ്രവാസി സംഘടനകളും വ്യക്തികളും. കൊല്ലം സ്വദേശി രമ്യ മോളിക്കാണ് പ്രവാസി സംഘടനകളുടെ സഹായഹസ്തം ജീവശ്വാസമായത്.
ജോലിയും ഭക്ഷണവും താമസവും മതിയായ ചികിത്സയും കിട്ടാതെ കൊല്ലം ശക്തികുളങ്ങര സ്വദേശി രമ്യ മോളി ഷാർജ ദുരിതത്തിൽ കഴിയുന്ന വാർത്ത കഴിഞ്ഞ ആഴ്ചയാണ് പ്രവാസലോകമറിഞ്ഞത്. ഇതേതുടർന്ന് പ്രവാസി വ്യവസായിയും വേൾഡ് മലയാളി കൗൺസിലും സഹായവുമായെത്തി. കോഴിക്കോട് സ്വദേശിയും ദുബായിലെ വ്യവസായിയുമായ ആളാണ് ആദ്യം സാമ്പത്തിക സഹായം എത്തിച്ചത്. പേരു വിവരങ്ങൾ വെളിപ്പെടുത്തരുതെന്ന അഭ്യർത്ഥനയോടെയാണ് അദ്ദേഹം സഹായധനം എത്തിച്ചത്. പണം അടയ്ക്കാത്തതിനാൽ വിഛേദിക്കപ്പെട്ട ഫ്ളാറ്റിലെ വെള്ളം – വൈദ്യുതി കണക്ഷനുകൾ ഇതോടെ പുനസ്ഥാപിക്കാനായി. വേൾഡ് മലയാളി കൗൺസിൽ ഗ്ലോബൽ പ്രസിഡന്റ് അടക്കമുള്ള ഭാരവാഹികൾ ഷാർജയിലെത്തി രമ്യ മോളിയേയും അനുജത്തി സൗമ്യയേയും സന്ദർശിച്ചു.
വേൾഡ് മലയാളി കൗൺസിൽ അജ്മാൻ പ്രോവിൻസിന്റെ നേതൃത്വത്തിൽ ഭക്ഷണ സാധനങ്ങളും അടിയന്തിര സാമ്പത്തിക സഹായവും നൽകി. രമ്യക്കും സൗമ്യക്കും തുടർന്ന് എല്ലാ സഹായങ്ങളും നൽകുമെന്നും അവർ അറിയിച്ചു. ഇതൊരു പുനർ ജനമമാണെന്നായിരുന്നു രമ്യയുടെ പ്രതികരണം.
അമ്മ മരിച്ചതിനെ തുടർന്ന് അനാഥരായ സഹോദരിമാർ ഷാർജയിൽ ബുട്ടിക് തുടങ്ങിയിരുന്നു. കോവിഡിനെ തുടർന്ന് ഇത് പൂട്ടേണ്ടിവന്നു. വാടക നൽകാത്തിനാൽ കേസുമായി. ഇതിനിടെ സുഹൃത്തായിരുന്ന മലയാളി രമ്യയെ ചതിച്ച് പണവുമായി മുങ്ങി. ഇതോടെ മാനസികമായും സാമ്പത്തികമായും തകർന്ന്, കിടപ്പാടമില്ലാതെ അലഞ്ഞു നടന്ന രമ്യയെ സാമൂഹ്യ പ്രവർത്തകനായ സിയാഫ് ആണ് ആശുപത്രിയിലെത്തിച്ചത്.
