പാരീസ് : പാരീസ് ഒളിംപിക്സ് ഹോക്കിയിൽ ഇന്ത്യക്ക് വെങ്കലത്തിളക്കം. സ്പെയിനിനെതിരെ ഒന്നിനെതിരെ രണ്ട് ഗോളുകള്ക്കാണ് ഇന്ത്യ മെഡല് നേട്ടം സ്വന്തമാക്കിയത്. ക്യാപ്റ്റന് ഹര്മന്പ്രീത് സിങിന്റെ ഇരട്ടഗോളുകളാണ് ഇന്ത്യയെ ചരിത്രവിജയത്തിലെത്തിച്ചത്. ടോകിയോ ഒളിംപിക്സിലെ മെഡല് നേട്ടത്തിന് പിന്നാലെയാണ് പാരിസിലും ടീം ഇന്ത്യ വിജയവേട്ട തുടര്ന്നിരിക്കുന്നത്. ഒളിംപിക്സിന് മുന്പ് വിരമിക്കല് പ്രഖ്യാപിച്ച, മലയാളികളുടെ അഭിമാനമായ ഗോൾകീപ്പർ പി ആർ ശ്രീജേഷിന് വീരോചിതമായ യാത്രയയപ്പുകൂടിയായി ഈ മെഡൽ നേട്ടം. ഒളിംപിക്സില് രണ്ട് മെഡല് നേടുന്ന ആദ്യ മലയാളി എന്ന ഖ്യാതിയും ഇനി ശ്രീജേഷിന് സ്വന്തം.
ഒളിംപിക്സ് ഹോക്കിയിലെ പതിമൂന്നാം മെഡലാണ് ഇന്ത്യ സ്വന്തമാക്കിയത്. ഗോൾ വല കാത്ത ശ്രീജേഷിന്റെ സേവുകൾ ഓരോ മത്സരത്തിലും നിര്ണായകമായിരുന്നു. ജര്മിനിയുമായുള്ള മത്സരത്തിലെ 2-3 എന്ന സ്കോറിലെ കടുത്ത നിരാശയ്ക്ക് ശേഷമാണ് ഇന്ത്യ ശക്തമായ തിരിച്ചുവരവ് നടത്തിയത്
തുടര്ച്ചയായ മെഡല് നേട്ടത്തില് ടീം ഇന്ത്യയെ പ്രധാനമന്ത്രി നരേന്ദ്രമോദി അഭിനന്ദിച്ചു. തലമുറകള് ഓര്ത്തുവയ്ക്കുന്ന വിജയമാണിതെന്നും കഴിവിന്റെ വിജയമാണിതെന്നും പ്രധാനമന്ത്രി പറഞ്ഞു. ശ്രീജേഷിന് മെഡൽ നേട്ടത്തോടെ വിരമിക്കാനായതില് അതീവ സന്തോഷമുണ്ടെന്ന് ശ്രീജേഷിന്റെ കുടുംബം മാധ്യമങ്ങളോട് പറഞ്ഞു.
