തിരുവനന്തപുരം: പൊതുമേഖലാ സർവ്വകലാശാലകൾക്കായുള്ള നാഷണൽ ഇൻസ്റ്റിറ്റ്യൂഷണൽ റാങ്കിംഗ് ഫ്രെയിംവർക്ക് (എൻഐആർഎഫ്) റാങ്കിംഗിൽ കേരളത്തിലെ സർവ്വകലാശാലകൾക്ക് മികച്ച വിജയം. കേരളത്തിലെ മൂന്ന് സർവ്വകലാശാലകൾ ആദ്യ 15 റാങ്കിംഗിൽ ഇടം നേടി. കേരള സർവ്വകലാശാല ഒമ്പതാം റാങ്കും കൊച്ചി ശാസ്ത്ര സാങ്കേതിക സർവ്വകലാശാല (കുസാറ്റ്) പത്താം റാങ്കും മഹാത്മാഗാന്ധി സർവ്വകലാശാല പതിനൊന്നാം സ്ഥാനവും കരസ്ഥമാക്കി. കൂടാതെ, ഇതേ വിഭാഗത്തിൽ കാലിക്കറ്റ് സർവ്വകലാശാല 43-ാം സ്ഥാനത്താണ്. ചെന്നൈയിലെ അണ്ണാ യൂണിവേഴ്സിറ്റി, പശ്ചിമ ബംഗാളിലെ ജാദവ്പൂർ യൂണിവേഴ്സിറ്റി, മഹാരാഷ്ട്രയിലെ സാവിത്രിഭായ് ഫുലെ പൂനെ യൂണിവേഴ്സിറ്റി എന്നിവയാണ് ആദ്യ മൂന്ന് റാങ്കുകൾ നേടിയത്.
സ്വകാര്യ സർവ്വകലാശാലകൾ, ഐഐടികൾ, ഐഐഎമ്മുകൾ എന്നിവയുൾപ്പെടെയുള്ള ഉന്നത വിദ്യാഭ്യാസ സ്ഥാപനങ്ങളുടെ മൊത്തത്തിലുള്ള പട്ടികയിൽ കേരള സർവ്വകലാശാല 38-ാം സ്ഥാനത്തും കുസാറ്റ് 51-ാം സ്ഥാനത്തും മഹാത്മാഗാന്ധി സർവ്വകലാശാലയ്ക്ക് 67-ാം സ്ഥാനവും ലഭിച്ചു. സർവ്വകലാശാലകൾക്കുള്ള പ്രത്യേക റാങ്കിംഗിൽ, കേരള സർവകലാശാല 21-ാം റാങ്കും കുസാറ്റ് 34-ാം റാങ്കും മഹാത്മാഗാന്ധി സർവ്വകലാശാല 37-ാം റാങ്കും കാലിക്കറ്റ് സർവ്വകലാശാല 89-ാം റാങ്കും നേടി. കൂടാതെ, നാല് സർക്കാർ കോളേജുകൾ ഉൾപ്പെടെ കേരളത്തിൽ നിന്നുള്ള 16 കോളേജുകൾ മികച്ച 100 കോളേജുകളുടെ പട്ടികയിൽ ഇടം നേടി. യൂണിവേഴ്സിറ്റി കോളേജ് തിരുവനന്തപുരം, മഹാരാജാസ് കോളേജ് എറണാകുളം, വിമൻസ് കോളേജ് തിരുവനന്തപുരം, ഗവൺമെൻ്റ് വിക്ടോറിയ കോളേജ് പാലക്കാട് എന്നിവ ഇതിൽ ഉൾപ്പെടുന്നു. റാങ്കിങ്ങിൽ ഉൾപ്പെട്ട 300 കോളേജുകളിൽ 71 എണ്ണം കേരളത്തിൽ നിന്നാണ്, 16 എണ്ണം സർക്കാർ കോളേജുകളാണ്. നാഷണൽ യൂണിവേഴ്സിറ്റി ഓഫ് അഡ്വാൻസ്ഡ് ലീഗൽ സ്റ്റഡീസ് (NUALS) നിയമ വിഭാഗത്തിൽ 38-ാം റാങ്ക് നേടി
