650 ൽ അധികം യു എസ് സൈനികർ കൊല്ലപ്പെടുകയോ പരിക്കേറ്റ് പിന്മാറുകയോ ചെയ്തതായി ഐആർജിസി അവകാശവാദം

ടെഹ്റാൻ : യു എസ് – ഇസ്രയേൽ സംയുക്താക്രമണത്തിന് മറുപടിയായി ഇറാൻ നൽകിയ തിരിച്ചടിയിൽ യുഎസ് സൈന്യത്തിന് കനത്ത നഷ്ടം സംഭവിച്ചതായി ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സ് (ഐആർജിസി). രണ്ട് ദിവസത്തിനുള്ളിൽ 650 ൽ അധികം സൈനികർ കൊല്ലപ്പെടുകയോ പരിക്കേൽക്കുകയോ ചെയ്തതായാണ് ഐആർജിസിയുടെ അവകാശവാദം. ബ്രിഗേഡിയർ ജനറൽ നൈനിയാണ് ഇക്കാര്യം സ്ഥിരീകരിച്ചത്.

പേർഷ്യൻ ഗൾഫ് മേഖലയിലെ യുഎസ് താവളങ്ങളെയും യുദ്ധക്കപ്പലുകളെയും ലക്ഷ്യമിട്ടാണ് ഇറാനിയൻ മിസൈൽ, ഡ്രോൺ ആക്രമണങ്ങൾ നടത്തിയതെന്നും ഇത് യുഎസ് വിമാനവാഹിനിക്കപ്പലായ യുഎസ്എസ് എബ്രഹാം ലിങ്കണിനെ ഇറാനിയൻ തീരത്ത് നിന്ന് പിൻവലിക്കാൻ നിർബന്ധിതരാക്കിയെന്നും ഐആർജിസി വക്താവ് ബ്രിഗേഡിയർ ജനറൽ അലി മുഹമ്മദ് നൈനി പറഞ്ഞു. പേർഷ്യൻ ഗൾഫ് മേഖലയിലെ യുഎസ് സൈനിക താവളങ്ങളിൽ ഇറാൻ സൈന്യം കനത്ത നാശനഷ്ടങ്ങൾ വരുത്തിയതായി വക്താവ് സ്ഥിരീകരിച്ചു.

ബഹ്‌റൈനിൽ അഞ്ചാം കപ്പൽപ്പടയ്‌ക്കെതിരായ ആക്രമണവും’ജനറൽ നൈനി എടുത്തുപറഞ്ഞു ഇറാനിയൻ മിസൈലുകളും ഡ്രോണുകളും ബഹ്‌റൈനിലെ യുഎസ് നാവികസേനയുടെ അഞ്ചാം കപ്പൽപ്പടയുടെ ആസ്ഥാനം ആവർത്തിച്ച് ആക്രമിച്ചു. ബഹ്‌റൈനിലെ ഒരു പ്രധാന യുഎസ് സൈനിക താവളം ലക്ഷ്യമിട്ടുണ്ടായ ആക്രമണത്തിൽ 160 യുഎസ് ഉദ്യോഗസ്ഥർ കൊല്ലപ്പെടുകയോ പരിക്കേൽക്കുകയോ ചെയ്തതായും നൈനി അവകാശവാദം ഉന്നയിച്ചു.

ഇതിനുപുറമെ, യുഎസ് നാവികസേനയുടെ ‘എംഎസ്ടി’ യുദ്ധ സഹായ കപ്പലിനും ഇറാനിയൻ നാവിക മിസൈലുകളിൽ നിന്ന് കനത്ത കേടുപാടുകൾ സംഭവിച്ചിട്ടുണ്ട്. ചബഹാർ തീരത്ത് നിന്ന് ഏകദേശം 250 മുതൽ 300 കിലോമീറ്റർ വരെ അകലെ നിലയുറപ്പിച്ച യുഎസ്എസ് എബ്രഹാം ലിങ്കണിന് നേരെ ഇറാനിയൻ നാവിക സേന നാല് ക്രൂയിസ് മിസൈലുകൾ പ്രയോഗിച്ചതായി ഐആർജിസി വക്താവ് വെളിപ്പെടുത്തി. ആക്രമണങ്ങളെത്തുടർന്ന്, വിമാനവാഹിനിക്കപ്പൽ സുരക്ഷയ്ക്കായി തെക്കുകിഴക്കൻ ഇന്ത്യൻ മഹാസമുദ്രത്തിലേക്ക് പലായനം ചെയ്തതായി റിപ്പോർട്ടുണ്ട്.