നടനും ടിവികെ നേതാവുമായ വിജയ്യുടെ ആരോപണത്തിന് മറുപടിയുമായി തമിഴ്നാട് മുഖ്യമന്ത്രി എംകെ സ്റ്റാലിൻ രംഗത്ത്. ചെന്നൈയിലെ കൊളത്തൂർ നിയമസഭാ മണ്ഡലത്തിൽ ഒരു പരിപാടിയിൽ സംസാരിക്കവെയാണ് ഭരണകക്ഷിക്കെതിരായ വിജയുടെ ആരോപണങ്ങൾക്ക് മുഖ്യമന്ത്രി സ്റ്റാലിൻ്റെ അളന്നുമുറിച്ചുള്ള മറുപടി.
വിജയ്യുടെ ആരോപണങ്ങൾ നിരസിച്ച സ്റ്റാലിൻ, മിക്ക തിരഞ്ഞെടുപ്പു വാഗ്ദാനങ്ങളും തങ്ങൾ നിറവേറ്റിയതായി എടുത്തു പറഞ്ഞു.
“ഞങ്ങളുടെ സർക്കാർ ഒന്നും ചെയ്തിട്ടില്ലെന്ന് ചിലർ അവകാശപ്പെടുന്നു. ഏത് പാർട്ടിയായാലും അവരെല്ലാം ഇത് കാണണം. ഞങ്ങൾ നൽകിയ വാഗ്ദാനങ്ങൾ എന്തായാലും ഞങ്ങൾ നിറവേറ്റി. ബാക്കിയുള്ള ഒന്നോ രണ്ടോ കാര്യങ്ങൾ ഉടൻ നടപ്പാക്കും.”മുഖ്യമന്ത്രി സ്റ്റാലിൻ തൻ്റെ പ്രസംഗത്തിൽ പറഞ്ഞു.
ദ്രാവിഡ മാതൃകാ ഭരണത്തിന് നന്ദി പറഞ്ഞ് കേന്ദ്രസർക്കാർ പുറത്തുവിട്ട വളർച്ചയുമായി ബന്ധപ്പെട്ട എല്ലാ വിവരങ്ങളിലും തമിഴ്നാട് മികച്ച പ്രകടനമാണ് കാഴ്ചവെച്ചതെന്ന് മുഖ്യമന്ത്രി പറഞ്ഞു.
പുതിയ പാർട്ടികൾ തുടങ്ങുന്നവർ ഡിഎംകെയുടെ നാശമാണ് ആഗ്രഹിക്കുന്നത്. നാലുവർഷത്തെ സർക്കാരിൻ്റെ വിജയത്തെക്കുറിച്ച് ചിന്തിക്കാൻ അവരോട് താഴ്മയോടെ പറയാൻ ഞാൻ ആഗ്രഹിക്കുന്നു. “നിരൂപകർ ദീർഘായുസ്സോടെ ജീവിക്കുക” എന്ന് അണ്ണ ഒരു വരിയിൽ പറയുമായിരുന്നു, ഇതാണ് ഞാൻ പറയാൻ ആഗ്രഹിക്കുന്നത്. വിമർശനങ്ങളെക്കുറിച്ച് ഞാൻ കാര്യമാക്കുന്നില്ല, ഞങ്ങളുടെ ജോലി ജനങ്ങളുടെ പ്രയോജനത്തിനായി പ്രവർത്തിക്കുക എന്നതാണ്. അനാവശ്യമായി ആരോടും പ്രതികരിക്കേണ്ട ആവശ്യമില്ലെന്നും സ്റ്റാലിൻ പറഞ്ഞു.
.
ഞായറാഴ്ച നടന്ന വിജയ്യുടെ പാർട്ടി തമിഴക വെട്രി കഴകം എക്സിക്യൂട്ടീവ് കൗൺസിൽ യോഗത്തിൽ തമിഴ്നാട്ടിലെ ക്രമസമാധാന പ്രശ്നത്തിന് വേണ്ടത്ര പ്രാധാന്യം നൽകാതെ കുറച്ചുപേർക്ക് പ്രയോജനപ്പെടുന്നുണ്ടെന്നും വിജയ് പറഞ്ഞിരുന്നു. ഡിഎംകെയുടെ തിരഞ്ഞെടുപ്പ് പ്രകടനപത്രിക കള്ളം നിറഞ്ഞതാണെന്നും അധികാരം പിടിക്കാനുള്ള ലക്ഷ്യത്തോടെയാണെന്നുമായിരുന്നു അദ്ദേഹത്തിൻെ മറ്റൊരാരോപണം.
