കൊച്ചി: നടനും എംഎല്എയുമായ മുകേഷിനെതിരെ ആരോപണവുമായി കാസ്റ്റിങ് ഡയറക്ടര് ടെസ് ജോസഫ്. പലതവണ അദ്ദേഹം രാത്രി മുറിയിലേക്ക് വരാന് ആവശ്യപ്പെട്ട് ഫോണിലുടെ നിര്ബന്ധിച്ചതായാണ് നടിയുടെ ആരോപണം.
2018ലും നടി ഇതേ ആരോപണം ഉന്നയിച്ചിരുന്നു. അന്ന് അത് വേറെ മുകേഷ് കുമാര് ആകാമെന്നായിരുന്നു നടന് മുകേഷിന്റെ പ്രതികരണം. എന്നാല് നടന് മുകേഷിന്റെ ചിത്രം ഉള്പ്പടെ സോഷ്യല്മീഡിയയില് പങ്കുവച്ചാണ് ടെസ് ജോസഫ് ഇപ്പോള് അത് മുകേഷ് തന്നൊയാണെന്ന് വെളിപ്പെടുത്തിയത്. സിനിമയിലെ സാങ്കേതിക പ്രവര്ത്തകയാണ് ടെസ് ജോസഫ്.
19 വർഷം മുൻപു ചാനൽ പരിപാടി ചിത്രീകരണത്തിനു ചെന്നൈയിലെ ഹോട്ടലിൽ താമസിക്കുമ്പോൾ, അവതാരകനായ മുകേഷ് രാത്രി നിരന്തരം വിളിച്ചു ശല്യപ്പെടുത്തിയെന്നും തന്റെ മുറി മുകേഷിൻ്റെ റൂമിൻ്റെ തൊട്ടടുത്താക്കാൻ ശ്രമിച്ചെ ന്നുമായിരുന്നു സിനിമാ സാങ്കേതിക പ്രവർത്തക ടെസ് ജോസഫിന്റെ അന്നത്തെ വെളിപ്പെടുത്തൽ. ദുരനുഭവം തന്റെ മേധാവിയായിരുന്ന ഡെറക് ഒബ്രിയനോടു പറഞ്ഞപ്പോൾ ആ പരിപാടിയിൽനിന്ന് ഒഴിവാക്കിത്തന്നുവെന്നും ടെസ് പറഞ്ഞിരുന്നു.
ആരോപണം എം മുകേഷ് എംഎൽഎ തള്ളിയിരുന്നു. ‘അങ്ങനെയൊരു സംഭവം ഓരമ്മയിലില്ല. തെറ്റിദ്ധരിച്ചതാകാനാണു സാദ്ധ്യത. ഫോണിൽ നിരന്തരം വിളിച്ചു ശല്യപ്പെടുത്തി എന്നാണ് ആരോപണം. ഞാൻ ഒരിക്കലും അങ്ങനെ ചെയ്യില്ല. മുകേഷ് കുമാർ എന്നു പറഞ്ഞു മറ്റാരെങ്കിലും വിളിച്ചതാകാം. ടെസ് ജോസഫിനെ കണ്ടതായി ഓർക്കുന്നില്ല.’
