തിരുവനന്തപുരം : വിഴിഞ്ഞം അന്താരാഷ്ട്ര തുറമുഖത്തിന് പുതിയ ലോക്കേഷന്‍ കോഡ് അനുവദിച്ചു. ഇന്ത്യയുടെയും തിരുവനന്തപുരം ജില്ലയുടെയും ചുരുക്കെഴുത്ത് ചേര്‍ത്ത് IN TRV 01 എന്നതാണ് പുതിയ ലോക്കേഷന്‍ കോഡ്. തുറമുഖ വകുപ്പ് മന്ത്രി വി.എൻ വാസവനാണ് ഇക്കാര്യം അറിയിച്ചത്. ഇന്ത്യയുടെയും നെയ്യാറ്റിന്‍കരയുടെയും ചുരുക്കെഴുത്ത് ചേർത്തുള്ള IN NYY 1 എന്ന ആദ്യത്തെ ലൊക്കേഷന്‍ കോഡ് മാറി ഇനി IN TRV 01എന്നാകും.
ഏകീകൃത ലോക്കേഷന്‍ കോഡ് വേണമെന്ന അംഗരാജ്യങ്ങള്‍ തമ്മിലുള്ള സാമ്പത്തിക സഹകരണവും ഏകീകരണവും പ്രോത്സാഹിപ്പിക്കുന്ന ഐക്യരാഷ്ട്ര സഭയുടെ അഞ്ച് പ്രാദേശിക കമ്മീഷനുകളില്‍ ഒന്നായ യുനൈറ്റഡ് നേഷന്‍സ് എക്കണോമിക് കമ്മീഷന്‍ ഫോര്‍ യൂറോപ്പ് (UNECE) നിര്‍ദ്ദേശിച്ചതിനെ തുടര്‍ന്നാണ് മാറ്റം വരുത്തിയത്.
തിരുവനന്തപുരം രാജ്യാന്തര വിമാനത്താവളത്തിൻ്റെ ലോക്കേഷന്‍ കോഡ് ടിആര്‍വി എന്നാണ്. അന്താരാഷ്ട്ര തലത്തില്‍ പ്രവര്‍ത്തിക്കുന്നതിനാല്‍ നിര്‍ദ്ദേശം സ്വീകരിച്ചുകൊണ്ട് വിഴിഞ്ഞം പോര്‍ട്ട് ഇതിനായി കേന്ദ്രസർക്കാരിൽ അപേക്ഷ നല്‍കി. കേന്ദ്രസര്‍ക്കാരിൻ്റെ ഡയറക്ട്രേറ്റ് ജനറല്‍ ഓഫ് സിസ്റ്റം ആന്‍ഡ് ഡാറ്റാ മാനേജ്‌മെന്‍റാണ് ലോക്കേഷന്‍ കോഡ് അനുവദിക്കുന്നത്. ഈ ഏജൻസി അനുവദിച്ച പുതിയ കോഡിനു UNECE ഇന്ന് അംഗീകാരം നൽകി. നാവിഗേഷന്‍, ഷിപ്പിങ്ങ് എന്നിവയ്ക്കെല്ലാം IN TRV 01 ലോക്കേഷന്‍ കോഡാണ് ഇനി ഉപയോഗിക്കുകയെന്നും മന്ത്രി അറിയിച്ചു.
