പോർബന്തർ : ഗുജറാത്തിലെ പോർബന്തറിൽ കോസ്റ്റ് ഗാർഡിന്‍റെ ഹെലികോപ്റ്റർ തകർന്ന് വീണ് മൂന്നു പേർ മരിച്ചു. കോസ്റ്റ് ഗാർഡ് വിമാനത്താവളത്തിന് സമീപമായിരുന്നു അപകടം. ഇന്ത്യൻ കോസ്റ്റുകാർഡിന്‍റെ എഎല്‍എച്ച് ധ്രുവ് എന്ന ഹെലികോപ്റ്റർ പതിവ് പരിശീലന പറക്കലിനിടെയാണ് തകർന്ന് വീണത്.
ഇന്ത്യൻ കോസ്റ്റ് ഗാർഡ് സംഭവത്തെക്കുറിച്ച് അന്വേഷണം തുടങ്ങി. സാങ്കേതിക തകരാറാണ് അപകടത്തിന് കാരണമെന്നാണ് പ്രാഥമിക നിഗമനം. രണ്ട് പൈലറ്റുമാരും ഒരു ജീവനക്കാരനുമാണ് മരിച്ചത്. അതേസമയം, ഹെലികോപ്റ്ററിൽ അഞ്ച് പേരുണ്ടായിരുന്നു എന്നും വിവരമുണ്ട്.
