കൊച്ചി: സ്വകാര്യ വാഹനങ്ങൾ വാടകയ്ക്ക് നൽകുന്ന സൂം കാർ ആപ്പ് കേരളത്തിൽ പ്രവർത്തിക്കുന്നത് അനുമതിയുമില്ലാതെയാണെന്ന റിപ്പോര്ട്ടിൻ്റെ അടിസ്ഥാനത്തിൽ നിയമലംഘനം സൈബർ കുറ്റകൃത്യമായി കണക്കായി കർശന നടപടിയെടുക്കണമെന്ന് സര്ക്കാരിന് നിര്ദ്ദേശം നല്കി ഹൈക്കോടതി. അഞ്ച് വർഷം മുമ്പ് ലൈസൻസ് കാലാവധി അവസാനിച്ച റെന്റ് എ കാർ കമ്പനിയാണ് സർക്കാരിനെയും കാർ ഉടമകളെയും വഞ്ചിച്ച് നിയമലംഘനം നടത്തി സംസ്ഥാനത്ത് പ്രവർത്തിക്കുന്നത്. സൈബർ കുറ്റകൃത്യത്തിന്റെ പരിധിയിൽ ഉൾപ്പെടുത്തി കർശന നടപടി സ്വീകരിക്കാൻ ജസ്റ്റിസ് ഡി.കെ സിങാണ് പോലീസിനും സൈബർ സെല്ലിനു നിർദ്ദേശം നൽകിയത്.
സൂം കാർ ഇന്ത്യ പ്രൈവറ്റ് ലിമിറ്റഡ് കമ്പനിയുടെ സർവ്വീസ് അനുമതി സംസ്ഥാനത്ത് 2019 ജനുവരി 20 ന് അവസാനിച്ചതാണ്. പിന്നീട് റെന്റ് എ കാർ ലൈസൻസ് കമ്പനി പുതുക്കിയിട്ടില്ല. . നിയമപരമായാണ് കമ്പനി പ്രവർത്തിക്കുന്നതെന്ന് വിശ്വസിച്ച് കാർ വാടകക്ക് നൽകിയ ഉടമകളും നിയമലംഘനത്തിൻ്റെ പേരിൽ കുരുക്കിലാവും. സൂം കാർ ആപ്പ് വഴി വാടകയ്ക്ക് നൽകിയ കാർ നഷ്ടപ്പെട്ട ഉടമകൾ ഇതിനിടെ തന്നെ ഹൈക്കോടതിയെ സമീപിച്ചിരുന്നു. സ്വകാര്യ കാറുകൾ വാടകയ്ക്ക് നൽകിയത് നിയമവിരുദ്ധമാണെന്നാണ് കോടതി പരാമർശം.
