തൃശൂർ: കബാലിയും പടയപ്പയും വെറും സിനിമാപ്പേരുകൾ മാത്രമല്ല, നാട്ടിലിറങ്ങി ഭീതി പടർത്തുന്ന കാട്ടാനകളാണ്. അതിരപ്പിള്ളി മലക്കപ്പാറ റോഡിൽ പരിഭ്രാന്തി പരാതി കബാലിയുടെ വിളയാട്ടം. ഇന്നലെ വൈകുന്നേരം ഒരു മണിക്കൂർ ആനമല റോഡിൽ കബാലി വാഹനങ്ങൾ തടഞ്ഞു. അതിരപ്പിള്ളി പ്ലാന്റേഷൻ മേഖലയിൽ കാട്ടാന റേഷൻ കട തകർത്തു. പാലക്കാടും മൂന്നാറിലും കോഴിക്കോട് ജനവാസ മേഖലയിൽ കാട്ടാന ഇറങ്ങി.
മലക്കപ്പാറ അടിച്ചിൽ തൊട്ടി കോളനിയിൽ നിന്ന് രണ്ട് രോഗികളെ താലൂക്ക് ആശുപത്രിയിലേക്ക് എത്തിച്ച് മടങ്ങി വരികയായിരുന്ന ആംബുലൻസിന് മുന്നിലാണ് ആദ്യം കബാലിയെത്തിയത്. റോഡിന് നടുവിൽ നിലയുറപ്പിച്ച കാട്ടാന ആംബുലൻസിന് നേരെ പാഞ്ഞടുത്തു. വൈകുന്നേരം അഞ്ചുമണിയോടുകൂടിയായിരുന്നു സംഭവം. വിനോദസഞ്ചാരികളും യാത്രക്കാരും ഉൾപ്പെടെ നിരവധി പേർ ഒരു മണിക്കൂറോളം റോഡിൽ കുടുങ്ങി.
കാലടി പ്ലാന്റേഷൻ അതിരപ്പിള്ളി ഡിവിഷനിൽ ഒമ്പതാം ബ്ലോക്കിൽ പോസ്റ്റ് ഓഫീസ് ജംഗ്ഷനിൽ കാട്ടാന റേഷൻ കട ആക്രമിച്ചു . ഇന്ന് പുലർച്ചയാണ് സംഭവം. റേഷൻകടയുടെ ഷട്ടർ തകർക്കുന്നതിനു മുൻപേ ആളുകൾ ബഹളം വച്ച് ആനയെ തുരത്തി.
മൂന്നാറിൽ കഴിഞ്ഞ 15 ദിവസമായി കാട്ടാന പടയപ്പ ജനവാസ മേഖലയിൽ തുടരുകയാണ്. ഇന്ന് പുലർച്ചെ അരുവിക്കാട് എത്തിയ ആന തോട്ടം തൊഴിലാളികളുടെ അടുക്കളത്തോട്ടം നശിപ്പിച്ചു. ആനയെ കാടുകയറ്റാൻ വനവകുപ്പ് ശ്രമിച്ചെങ്കിലും പരാജയപ്പെട്ടു. പാലക്കാട് ധോണിയിലും കാട്ടാന ഇറങ്ങി കൃഷി നശിപ്പിച്ചു. സ്ഥലവാസിയായ ഗോപിയുടെ തെങ്ങും കവുങ്ങും കാട്ടാന പിഴുതെറിഞ്ഞു.
