മൂന്നാർ : മൂന്ന് പോലീസുകാരെ ബോംബ് എറിഞ്ഞ് കൊലപ്പെടുത്തിയ മാവോയിസ്റ്റിനെ മൂന്നാറിൽ വെച്ച് പിടികൂടി എൻഐഎ. ഝാർഖണ്ഡ് സ്വദേശി സഹൻ ടുടി ആണ് പിടിയിലായത്. സംഭവത്തിന് ശേഷം രക്ഷപ്പെട്ട് മൂന്നാർ ഗൂഡാർവിള എസ്റ്റേറ്റിൽ ഭാര്യയോടൊപ്പം അതിഥി തൊഴിലാളിയായി ജോലി ചെയ്തു വരികയായിരുന്നു എൻഐഎ സംഘത്തിന്റെ അന്വേഷണത്തിനിടയിൽ നിന്ന് ലഭിച്ച രഹസ്യ വിവരത്തെ തുടർന്നാണ് പ്രതിയെ മൂന്നാറിൽ നിന്ന് ഇന്നലെ രാത്രി മൂന്നാർ പോലീസിന്റെ സഹായത്തോടെ ഗൂഡാർവിള എസ്റ്റേറ്റിൽ നിന്ന് പിടികൂടിയത്. വൈദ്യ പരിശോധനയ്ക്ക് ശേഷം മൂന്നാർ പോലീസ് സ്റ്റേഷനിൽ പ്രതിയെ പാർപ്പിച്ചിരിക്കുകയാണ്.
2021-ലാണ് ഝാർഖണ്ഡിൽ ബോംബ് സ്ഫോടനത്തിലൂടെ മൂന്ന് പോലീസുകാരെ പ്രതി കൊലപ്പെടുത്തിയത്. ഒന്നര വർഷം മുൻപാണ് സഹൻ ടുടി കേരളത്തിൽ എത്തിയത്. സഹനൊപ്പം കൂടുതൽ ആളുകൾ കേരളത്തിൽ എത്തിയിട്ടുണ്ടെന്നാണ് നിഗമനം. ഇവരെയും കണ്ടെത്താനുള്ള അന്വേഷണം നടക്കുന്നു. പ്രതിയുമായി ഇന്ന് എൻഐഎ സംഘം കൊച്ചിയിലേക്ക് തിരിക്കും.
