വാളയാർ : കാറിൽ കടത്തിയ 12 ഗ്രാം എംഡിഎംഎയുമായി അമ്മയും മകനും അടങ്ങിയ 4 അംഗ സംഘം അറസ്റ്റിൽ. ഞായറാഴ്ച രാത്രി ഏഴോടെ വാളയാർ എക്സൈസ് ചെക്ക്പോസ്റ്റിൽ വാഹന പരിശോധനയ്ക്കിടെയാണ് സംഘം പിടിയിലായത്. തൃശൂർ കൊടുങ്ങല്ലൂർ സ്വദേശി അശ്വതി (39), മകൻ ഷോൺസണ്ണി (20), അശ്വതിയുടെ സുഹൃത്തുക്കളും ഐടി പ്രൊഫഷനലുകളുമായ കോഴിക്കോട് എലത്തൂർ മുഖവൂർ സ്വദേശി മൃദുൽ (29), അശ്വിൻലാൽ (26) എന്നിവരാണ് അറസ്റ്റിലായത്.
അശ്വതി ഉൾപ്പെട്ട സംഘം വർഷങ്ങളായി ലഹരിവസ്തുക്കൾ ഉപയോഗിക്കുന്നവരാണെന്നാണ് എക്സൈസ് നൽകുന്ന വിവരം. ബെംഗളൂരുവിൽ നിന്നെത്തിക്കുന്ന രാസലഹരി വസ്തുക്കൾ കോഴിക്കോട്ടെ കോളേജ് വിദ്യാർത്ഥികൾക്കിടയിലാണ് ഇവർ വിൽപന നടത്തിയിരുന്നത്. ദേശീയപാതയിൽ വാഹന പരിശോധനയിലുണ്ടായിരുന്ന എക്സൈസ് ഉദ്യോഗസ്ഥരെ കണ്ട് അമിത വേഗത്തിൽ ഓടിച്ചു പോയ കാർ ചന്ദ്രാപുരത്തു വച്ചു പിന്തുടർന്നു പിടികൂടുകയായിരുന്നു.
വാളയാർ എക്സൈസ് ചെക്പോസ്റ്റ് സ്പെക്ടർ എ.മുരുകദാസ്, അസി. ഇൻസ്പെക്ടർ സി.മേഘനാഥ്, പ്രിവന്റീവ് ഓഫിസർ കെ.വി.ദിനേഷ്, സിവിൽ എക്സൈസ് ഓഫിസർ ആർ. പ്രശാന്ത്, കെ. ശരവണൻ, എ. അജിത എന്നിവരടങ്ങിയ സംഘമാണ് പരിശോധനയിൽ പ്രതികളെ പിടികൂടിയത്.
