ന്യൂഡൽഹി : ഞായറാഴ്ച വൈകുന്നേരം ഡൽഹിയിൽ തുടർച്ചയായി പെയ്തിറിങ്ങിയ കനത്ത മഴയിൽ പല പ്രദേശങ്ങളും വെള്ളക്കെട്ടിൽ അകപ്പെട്ടു. നേരത്തെ പ്രഖ്യാപിച്ച ഓറഞ്ച് അലേർട്ട് കാലാവസ്ഥാ വകുപ്പ് റെഡ് അലേർട്ടാക്കി ഉയർത്തി. അടുത്ത രണ്ട് മണിക്കൂറിനുള്ളിൽ തലസ്ഥാന നഗരത്തിൽ കനത്തതോ വളരെ ശക്തമായതോ ആയ മഴ ലഭിക്കുമെന്ന് ഇന്ത്യൻ കാലാവസ്ഥാ വകുപ്പ് (IMD) സായാഹ്ന ബുള്ളറ്റിനിൽ അറിയിച്ചു.
കൂടാതെ, ഡൽഹിയുടെ അയൽ സംസ്ഥാനമായ ഹരിയാനയിലെ സോണിപത്, ഖാർഖോഡ, ഝജ്ജർ, ഫാറൂഖ്നഗർ, സോഹാന, പൽവാൾ, നുഹ് എന്നിവിടങ്ങളിൽ ഇടിമിന്നലോടുകൂടിയ കനത്ത മഴയും 30-40 കിലോമീറ്റർ വേഗതയിൽ കാറ്റും ഉണ്ടാകാൻ സാദ്ധ്യതയും പ്രവചിക്കുന്നു. ഹരിയാനയുടെ കിഴക്കൻ ഭാഗങ്ങളിലും പടിഞ്ഞാറൻ യുപിയിലും നേരിയതോതിൽ ഇടിമിന്നലോടുകൂടിയുള്ള മഴ മുന്നറിയിപ്പുമുണ്ട്.
