കണ്ണൂർ : ഒരു മൂന്നാം ക്ലാസ്സുകാരൻ്റെ ഉത്തരക്കടലാസ് സോഷ്യൽ മീഡിയയിൽ ഇപ്പോൾ വൈറലാണ്. ഉത്തരത്തിലെ അവസാന വരിയിൽ വിദ്യാഭ്യാസ മന്ത്രിയും അത്ഭുതപ്പെട്ടു. പിറകെ വന്നു മന്ത്രിയുടെ വക അഭിനന്ദനവും! ഫെയ്സ്ബുക്ക് കുറിപ്പിലൂടെയാണ് മന്ത്രി ശിവൻകുട്ടി ഇക്കാര്യം പങ്കു വെച്ചത്.
ഇഷ്ടപ്പെട്ട കളിയും അതിനു വേണ്ട നിയമാവലിയും തയ്യാറാക്കാനായിരുന്നു ചോദ്യം. ഉത്തരക്കടലാസിൽ അക്കമിട്ട് എഴുതിയ ഉത്തരങ്ങളിൽ അവസാനമായി ആ വിദ്യാർത്ഥി എഴുതിച്ചേർത്ത നിയമാവലി ഇങ്ങനെയായിരുന്നു – ജയിച്ചവർ തോറ്റവരെ കളിയാക്കരുത്! ജീവിതത്തിലെ മികച്ച സന്ദേശം ഉത്തരക്കടലാസിൽ പകർത്തിയ തലശ്ശേരി ഒ ചന്തുമേനോൻ സ്മ‌ാരക വലിയമാടാവിൽ ഗവ. യു പി സ്ക്കൂളിലെ അഹാൻ അനൂപ് എന്ന എട്ടുവയസ്സുകാരന് അഭിവാദ്യങ്ങൾ നേരുന്നതായി മന്ത്രി ഫെയ്സ്ബുക്കിൽ കുറിച്ചു.
മന്ത്രി ശിവൻകുട്ടിയുടെ ഫെയ്സ്ബുക്ക് പോസ്റ്റ് –
“ജയിച്ചവർ തോറ്റവരെ കളിയാക്കരുത്.. “
ജീവിതത്തിലെ മികച്ച സന്ദേശം ഉത്തരക്കടലാസ്സിൽ പകർത്തിയ മൂന്നാം ക്ലാസ്സുകാരന് അഭിവാദ്യങ്ങൾ..
അഹാൻ അനൂപ്,
തലശ്ശേരി ഒ ചന്തുമേനോൻ സ്മ‌ാരക വലിയമാടാവിൽ ഗവ. യു പി സ്കൂ‌ൾ
നമ്മുടെ പൊതുവിദ്യാലയങ്ങൾ ഇങ്ങിനെയൊക്കെയാണ് മുന്നേറുന്നത്..
