എക്സിറ്റ് പോള് എക്സിറ്റ് പോള് മാത്രമാണെന്നും അവസാന വാക്കല്ലെന്നും സിപിഐ സംസ്ഥാന സെക്രട്ടറി ബിനോയ് വിശ്വം. മുഖവിലയ്ക്ക് എടുക്കേണ്ടത് ജനങ്ങളെയാണെന്നും ലവലേശം കുറയാതെ ഞങ്ങള് ഇപ്പോഴും ആ പ്രതീക്ഷയില് ഉറച്ചുനില്ക്കുന്നുവെന്നും ബിനോയ് വിശ്വം പറഞ്ഞു.
എല്ഡിഎഫിന് ഇപ്പോഴും ശുഭപ്രതീക്ഷയുണ്ട്. പണ്ടും എക്സിറ്റ്പോള് ഇത്തരം കഥകള് പറഞ്ഞതാണ്. കഥകളൊക്കെ കഥകളാണ്. എക്സിറ്റ് പോളുകള് ആരുടെ പ്രതീക്ഷ എന്ന ചോദ്യം ഉണ്ട്. ആര്ക്ക് വേണ്ടിയുള്ള പ്രതീക്ഷയാണ് അത് എന്നതും വ്യക്തമാണ്. ഈ പ്രതീക്ഷിക്കുന്നവരെല്ലാം ഒരു പ്രത്യേക രാഷ്ട്രീയത്തിന്റെ കാഴ്ചയുള്ളവരാണ്. ആ കണ്ണടയാണ് അവരുടെയൊക്കെ കാഴ്ചയ്ക്ക് അടിസ്ഥാനം. ജനങ്ങളുടെ കാഴ്ചയാണ് പ്രധാനം – ആത്മവിശ്വാസം പോരാതെ ബിനോയ് വിശ്വം വ്യക്തമാക്കി.
കേരളത്തില് തുടർ ഭരണസാദ്ധ്യതയില്ലെന്നും യുഡിഎഫിന്റെ തിരിച്ചുവരവാണ് എക്സിറ്റ് പോള് പ്രവചിക്കുന്നത്. 70 മുതല് 90 സീറ്റുകള് വരെ പല എക്സിറ്റ് പോളുകൾ സൂചിപ്പിക്കുന്നു. . എല്ഡിഎഫ് എഴുപത് സീറ്റുകളിലേക്ക് എത്തില്ലെന്നാണ് സര്വേകള് വിലയിരുത്തുന്നത്. ആക്സിസ് മൈ ഇന്ത്യയാണ് യുഡിഎഫിന് ഏറ്റവും കൂടുതല് സീറ്റുകള് പ്രവചിച്ചിരിക്കുന്നത്. എണ്പത് മുതല് തൊണ്ണൂറ് സീറ്റ് വരെ. എന്ഡിഎ നാല് സീറ്റുവരെ നേടുമെന്നും പ്രവചനമുണ്ട്
