ന്യൂഡൽഹി : രാജ്യത്ത് വാണിജ്യ എൽപിജി സിലിണ്ടറുകളുടെ വില വർദ്ധിപ്പിച്ചതിന് പിന്നാലെ മറ്റൊരു ഇരട്ട പ്രഹരം കൂടി ജനങ്ങൾക്കുമേൽ വരുന്നു. പെട്രോൾ – ഡീസൽ വില വർദ്ധിപ്പിക്കുന്നതിന് പുറമെ ഗാർഹിക എൽപിജി സിലിണ്ടറുകളുടെ വിലയും കൂട്ടിയേയ്ക്കുമെന്നുള്ള റിപ്പോർട്ടുകളാണ് പുറത്തുവരുന്നത്.
പെട്രോൾ, ഡീസൽ വില ലിറ്ററിന് ഏകദേശം 4–5 രൂപ വരെ വർദ്ധിപ്പിക്കാനാണ് സാദ്ധ്യത. ഗാർഹിക എൽപിജി സിലിണ്ടറുകൾക്കാകട്ടെ, ഏകദേശം 40–50 രൂപ വരെ കൂടിയേക്കും. അടുത്ത ഒരാഴ്ചയ്ക്കുള്ളിൽ നിരക്ക് വർദ്ധനവ് പ്രാവർത്തികമാക്കാനാണ് സാദ്ധ്യത. അന്തിമ തീരുമാനമായിട്ടില്ല.
പശ്ചിമേഷ്യയിലെ സംഘർഷത്തിൻ്റെ പശ്ചാത്തലത്തിൽ ക്രൂഡ് ഓയിൽ വിലയിലുണ്ടായ സമീപകാല കുതിച്ചുചാട്ടമാണ് വിലവർദ്ധനവിന് കാരണമായി പറയുന്നത്. ആഗോളതലത്തിൽ ക്രൂഡ് ഓയിൽ വിലയിലുണ്ടായ വർദ്ധന എണ്ണ വിപണന കമ്പനികളുടെ സാമ്പത്തിക സമ്മർദ്ദം വർദ്ധിപ്പിച്ചിട്ടുണ്ടെന്നും ചില്ലറ വിൽപ്പന വിലകൾ പരിധിയിൽ നിലനിർത്തുന്നത് നഷ്ടം വർദ്ധിപ്പിക്കുന്നുവെന്നുമാണ് റിപ്പോർട്ട്.
