തിരുവനന്തപുരം: സംസ്ഥാന സർക്കാർ തുടക്കമിട്ട കേരളത്തിൻ്റെ സ്വന്തം ഇൻ്റർനെറ്റ് കമ്പനിയായ കെ-ഫോൺ ഡിസംബറിനകം ഒരു ലക്ഷം കണക്ഷൻ എന്ന ലക്ഷ്യത്തിലേക്ക് ചുവടുവെക്കുകയാണ്. സൗജന്യ കണക്ഷനുകൾക്ക് പുറമെ ഇതിനകം 12,000 ത്തിലധികം വാണിജ്യ കണക്ഷനുകളും നൽകിക്കഴിഞ്ഞു. സാങ്കേതിക സംവിധാനങ്ങൾ മെച്ചപ്പെട്ടതോടെ 150 – 200 കണക്ഷൻ പ്രതിദിനം നൽകുന്നുണ്ട്.
കണക്ഷൻ നടപടികൾക്ക് വേഗം കൂട്ടുകയെന്ന ലക്ഷ്യത്തോടെ കെ-ഫോൺ അധികൃതർ ലോക്കൽ നെറ്റ് വർക്ക് പ്രൊവൈഡർമാരുമായി കൂടിക്കാഴ്ച നടത്തി. 10 ജില്ലകളിൽ ഇതിനകം കേബിൾ ഓപ്പറേറ്റർമാരുമായി ചർച്ച പൂർത്തിയാക്കി. കെ-ഫോൺ എംഡി ഡോ. സന്തോഷ് ബാബു യോഗത്തിൽ പങ്കെടുത്തു.
കൂടുതൽ ഓപ്പറേറ്റന്മാരെ കെ-ഫോൺ ശ്രംഖലയിലേക്ക് ആകർഷിക്കാൻ ലക്ഷ്യമിട്ട് കൊച്ചിയിൽ സംഘടിപ്പിച്ച യോഗത്തിൽ 150 ഓപ്പറേറ്റന്മാർ പങ്കെടുത്തു. നിലവിലെ എൽഎൻപി പ്രതിനിധികൾ ഉന്നയിച്ച പ്രശ്നങ്ങൾക്ക് പരിഹാരം കാണുമെന്നും അധികൃതർ വ്യക്തമാക്കി.
