തൃശൂര്: കേരത്തിലെല്ലായിടത്തും ബിജെപിക്കായി കള്ളപ്പണമെത്തിച്ചെന്ന് ധർമരാജന്റെ മൊഴി. കാസർഗോഡ് മുതല് തിരുവനന്തപുരം വരെ കള്ളപ്പണം കൊണ്ടുപോയി കൊടുത്തെന്നാണ് മൊഴി. കാസർഗോഡ് പോയി കോഴിക്കോട് മേഖലാ സെക്രട്ടറിക്ക് നല്കിയത് ഒന്നര കോടി, കോഴിക്കോട് ഒരു കോടി, ആലപ്പുഴ ഒന്നര കോടി, കണ്ണൂരിലേക്ക് 1.40 കോടി എന്നിങ്ങനെയാണ് മൊഴി. തൃശൂരിലും തിരുവനന്തപുരത്തുമാണ് കൂടുതൽ എത്തിയത് – യഥാക്രമം 12 കോടിയും 10 കോടിയിലേറെ. ആകെ എട്ട് കോടി കവര്ച്ച ചെയ്യപ്പെട്ടു എന്നും ആദ്യ അന്വേഷണത്തിന്റെ ഭാഗമായി നൽകിയ മൊഴിയിൽ പറയുന്നു.
നിയമസഭാ തെരഞ്ഞെടുപ്പ് കാലത്ത് ആകെ കേരളത്തിൽ എത്തിയത് 41 കോടി രൂപയാണ്. കര്ണാടകത്തില് നിന്ന് നേരിട്ടെത്തിച്ചത് 14 കോടിയോളം രൂപ. 8 കോടി കവർച്ച ചെയ്യപ്പെട്ടു. മൂന്നരക്കോടി കൊടകരയില് കവര്ന്നെന്നും നാലരക്കോടി സേലത്ത് കവര്ന്നെന്നും ധർമരാജന്റെ മൊഴിയിൽ പറയുന്നു. 2021 കാലത്തെ നിയമസഭാ തെരഞ്ഞെടുപ്പ് കാലത്ത് ആകെ കേരളത്തിലെത്തിയ കോടികളുടെ കണക്കാണ് ഇപ്പോൾ ധര്മ്മരാജന് പൊലീസിനോട് വെളിപ്പെടുത്തിയത്.
പൊലീസ് ഇക്കാര്യം ഇഡിയെയും ഐടിയെയും യഥാസമയം അറിയിച്ചിട്ടുണ്ടെന്നാണ് റിപ്പോർട്ട്. കള്ളപ്പണത്തിന്റെ ഉറവിടം കണ്ടെത്തേണ്ട ഇ.ഡിയാകട്ടെ ഈ കേസ് സമഗ്രമായി ഇതുവരെ അന്വേഷിച്ചിട്ടില്ല. സംഭവം തുറന്നു പറഞ്ഞ തിരൂര് സതീശന് ആക്രമണ ഭീഷണി നിലനില്ക്കുന്നതിനാൽ പോലീസ് കാവല് തുടരുന്നുണ്ട്.
