കൊച്ചി: കൊച്ചി ശാസ്ത്ര സാങ്കേതിക സർവ്വകലാശാലയിലെ 2024ലെ ഭരണഭാഷാവാരം പരിപാടി നവംബർ ഒന്നിന് ഭരണകാര്യാലയത്തിൽ വൈസ് ചാൻസലർ ഡോ. എം ജുനൈദ് ബുഷിരി ചൊല്ലിക്കൊടുത്ത ഭരണഭാഷാപ്രതിജ്ഞയോടെ ആരംഭിച്ചു. പരിപാടികളുടെ ഔപചാരികമായ ഉദ്ഘാടനം ദേശീയ പുരസ്‌കാര ജേതാവായ തിരക്കഥാകൃത്തും പ്രശസ്ത നിർമാതാവും നടനുമായ ശ്രീ. ശ്യാം പുഷ്കരൻ നിർവഹിച്ചു. സിനിമാരചനയിലേക്ക് തന്നെ നയിച്ച സാഹചര്യങ്ങൾ ഓർത്തെടുത്ത് അനുഭവങ്ങൾ പങ്കുവച്ച ശ്യാം പുഷ്‌കരൻ്റെ പ്രസംഗം ഹൃദ്യമായി. “സിനിമയ്ക്ക് വേണ്ടത് മലയാളമല്ല, ദൃശ്യഭാഷയാണ്. എന്നാൽ ഡയലോഗിന് ഭാഷ അത്യാവശ്യമാണ്. കഥയും തിരക്കഥയും രചിക്കുന്നത് എങ്ങനെ എന്ന് പഠിക്കാനാകും. സംഭാഷണം പക്ഷെ നിരീക്ഷണങ്ങളിൽ നിന്നും അനുഭവങ്ങളിൽ നിന്നും ആർജ്ജിച്ചെടുക്കേണ്ടതാണ്,” ശ്യാം പുഷ്കരൻ പറഞ്ഞു. എഴുത്തിലും വിഷ്വൽ തിങ്കിങ്ങിലും സിനിമാ രചനകളിലെ രാഷ്ട്രീയത്തിലും തന്നെ സ്വാധീനിച്ചിട്ടുള്ള ഓട്ടൻതുള്ളൽ, കഥാപ്രസംഗം, കാർട്ടൂൺ തുടങ്ങിയ കലാരൂപങ്ങളെക്കുറിച്ച് അദ്ദേഹം തൻ്റെ പ്രസംഗത്തിൽ പ്രതിപാദിച്ചു.മൂന്ന് ദിവസത്തെ മലയാളദിനം പുസ്തകോത്സവം രജിസ്ട്രാർ ഡോ. അരുൺ എ യു ഉദ്ഘാടനം ചെയ്തു.
ഭരണഭാഷാവാരത്തിന്റെ ഭാഗമായി രണ്ടാം തീയ്യതി ജീവനക്കാർക്കായി ഗവണ്മെന്റ് സെക്രട്ടേറിയറ്റിലെ ഭാഷാവിദഗ്ധൻ ഡോ ആർ ശിവകുമാറിന്റെ
ഭരണഭാഷാപ്രയോഗങ്ങൾ ആസ്പദമാക്കിയ ക്ലാസ്സ് സംഘടിപ്പിക്കും.
ആറിന് ഇംഗ്ലീഷ്-വിശേഷഭാഷാവിഭാഗം മേധാവി ഡോ. ബൃന്ദ ബാല ശ്രീനിവാസൻ രചിച്ച ‘അനിതാഖിലം’ എന്ന പുസ്തകം രജിസ്ട്രാർ പ്രകാശനം ചെയ്യും. സർവ്വകലാശാലാ സമൂഹത്തിൽ നിന്നുള്ള എഴുത്തുകാരെ ആദരിക്കുന്ന ഒരു ചടങ്ങിന് പുറമെ കവിതാപാരായണം, പ്രശ്നോത്തരി, തുടങ്ങി വിവിധ മത്സരങ്ങളും ഒരാഴ്ച നീണ്ടു നിൽക്കുന്ന പരിപാടികളുടെ ഭാഗമാകും. നവംബർ ഏഴിന് നടക്കുന്ന സമാപനസമ്മേളനത്തിൽ കേളരാസാഹിത്യ അക്കാദമി പുരസ്‌കാരജേതാവ് ഡോ. ആർ. രാജശ്രീ മുഖ്യാതിഥിയാകും. ഭാഷാപുരസ്കാരവിതരണവും സമ്മാനദാനവും കലാപരിപാടികളും സമാപനദിനത്തിന്റെ മാറ്റ് കൂട്ടും.
