കൊച്ചി: തിരുന്നാവായ-തവനൂർ പാലത്തിൻ്റെ നിലവിലെ അലൈമെൻ്റ് കാര്യത്തിൽ മെട്രോമാൻ ഇ ശ്രീധരൻ ഉന്നയിച്ച പരാതി പരിഗണിക്കണമെന്ന് കേരള ഹൈക്കോടതി. പിഡബ്ല്യൂഡി സെക്രട്ടറിയ്ക്കാണ് നിർദ്ദേശം നൽകിയത്.
പാലം നിർമ്മിക്കാനുദ്ദേശിക്കുന്ന നിലവിലെ അലൈമെൻ്റ് തിരുന്നാവായയിലെ ആരാധനാകേന്ദ്രങ്ങളെയും പൈതൃകകേന്ദ്രങ്ങളെയും ബാധിക്കുന്നതാണെന്നും അതിൽ മാറ്റം വേണമെന്നും ആവശ്യപ്പെട്ട് ഇ ശ്രീധരൻ നൽകിയ ഹർജി തീർപ്പാക്കിയാണ് ചീഫ് ജസ്റ്റിസ് നിധിൻ ജാംദാർ, ജസ്റ്റിസ് എസ് മനു എന്നിവരടങ്ങിയ ഡിവിഷൻ ബെഞ്ചിൻ്റെ ഉത്തരവ്.
നിലവിലെ അലൈമെൻ്റിൽ മാറ്റം വരുത്തിയില്ലെങ്കിൽ കേരള ഗാന്ധി കെ കേളപ്പൻ്റെ സ്മൃതി മണ്ഡപമടക്കമുള്ള ചരിത്ര സ്മാരകങ്ങൾ തകർക്കേണ്ടിവരുമെന്നും ഭാരതപ്പുഴയുടെ തീരത്തുള്ള നാവാമുകുന്ദ ക്ഷേത്രത്തിൻ്റെ പവിത്രതയെ ബാധിക്കുമെന്നുമാണ് ശ്രീധരൻ ഹർജിയിൽ പറയുന്നത്.
