കൊച്ചി: മലയാളത്തിൻ്റെ മഹാനടന് മമ്മൂട്ടി പകര്ത്തിയ നാട്ടു ബുള്ബുള് പക്ഷിയുടെ ചിത്രം ലേലം ചെയ്തു. മൂന്നു ലക്ഷം രൂപയ്ക്കാണ് ചിത്രം മലപ്പുറം കോട്ടക്കൽ സ്വദേശി ലേലത്തിൽ കരസ്ഥമാക്കിയത്. ഒരു ലക്ഷം രൂപയായിരുന്നു അടിസ്ഥാനവില. കോട്ടയ്ക്കൽ ആസ്ഥാനമായി പ്രവർത്തിക്കുന്ന
ലീന ഗ്രൂപ്പ് ഓഫ് ബിസിനസിന്റെ ചെയർമാനായ അച്ചു ഉള്ളാട്ടിലാണ് ചിത്രം സ്വന്തമാക്കിയത്. അച്ചു ഉള്ളാട്ടിലിനെ പ്രതിനിധീകരിച്ച് എം.രാമചന്ദ്രനാണ് യോഗത്തിൽ പങ്കെടുത്തത്. ഫൗണ്ടേഷന്റെ സാരഥികളിൽ ഒരാളായ നടൻ വി.കെ.ശ്രീരാമൻ ചിത്രം കൈമാറി.
ചിത്രം ലേലം ചെയ്ത് കിട്ടിയ പണം ഇന്ദുചൂഡന് ഫൗണ്ടേഷന്റെ പ്രവര്ത്തനങ്ങള്ക്ക് വിനിയോഗിക്കും. ഇന്ദുചൂഡൻ എന്ന തൂലികാനാമത്തിൽ അറിയപ്പെടുന്ന പ്രശസ്തനായ പക്ഷിനിരീക്ഷകൻ കെ.കെ.നീലകണ്ഠന്റെ ‘കേരളത്തിലെ പക്ഷികൾ’ എന്ന പുസ്തകം പരിചയപ്പെടുത്തുന്ന 261 ഇനം പക്ഷികളെ പകർത്തിയ കേരളത്തിലും പുറത്തും പ്രശസ്തരായ ഫോട്ടോഗ്രാഫർമാരുടെ മുപ്പതിലേറെ പക്ഷികളുടെ ചിത്രങ്ങളാണ് എറണാകുളം ദർബാർ ഹാളിൽ പ്രദർശിപ്പിച്ചത്. മമ്മൂട്ടിയെ കൂടാതെ ഇരുപത്തിരണ്ട് ഛായാഗ്രാഹകരുടെ 61 ഫോട്ടോകൾ പ്രദര്ശനത്തിനുണ്ടായിരുന്നു. ഇലത്തുമ്പില് വിശ്രമിക്കുന്ന നാട്ടു ബുള്ബുളിന്റെ മനോഹര ചിത്രമാണ് മമ്മൂട്ടിയുടേതായി ഇക്കൂട്ടത്തിൽ പ്രദർശിപ്പിച്ചതും ലേലം ചെയ്തതും.
സാഹിത്യ നിരൂപകൻ എം.കെ. സാനു സമാപന സമ്മേളനം ഉദ്ഘാടനം ചെയ്തു. എഴുത്തുകാരനും വാഗ്മിയുമായ സുനിൽ ഇളയിടം, വൈൽഡ് ലൈഫ് ഫോട്ടോഗ്രാഫർ സുരേഷ് ഇളമൺ, എക്സിബിഷൻ ക്യൂറേറ്റർ എം.രാമചന്ദ്രൻ എന്നിവർ സംസാരിച്ചു.
