[Photo Courtesy : PTI / X]
മുർഷിദാബാദ് : പശ്ചിമ ബംഗാളിലെ മുർഷിദാബാദ് ജില്ലയിൽ സ്‌കൂൾ വാനിൽ ട്രെയിൻ ഇടിച്ച് രണ്ട് വിദ്യാർത്ഥികൾ ഉൾപ്പെടെ മൂന്ന് പേർ മരണപ്പെട്ടു. വെള്ളിയാഴ്ച രാവിലെ ഏഴ് മണിയോടെ കർണ്ണ സുബർണ്ണ റെയിൽവേ സ്റ്റേഷന് സമീപമുള്ള ഗോബിന്ദപൂർ ലെവൽ ക്രോസിങ് ഗേറ്റിലായിരുന്നു അപകടം. സ്ക്കൂൾ വാൻ ട്രാക്ക് മുറിച്ചുകടക്കാൻ ശ്രമിക്കുന്നതിനിടെയാണ് ട്രെയിൻ ഇടിച്ചത്.
അപകടത്തിനിടയിൽ ഒരു സൈക്കിൾ യാത്രക്കാരനും പരിക്കേറ്റു. വാനിലുണ്ടായിരുന്ന നിരവധി കുട്ടികളെ ഗുരുതര പരിക്കുകളോടെ ബെർഹാംപൂർ ആശുപത്രിയിൽ പ്രവേശിപ്പിച്ചു. ഇടിയുടെ ആഘാതത്തിൽ വാനിൻ്റെ മുകൾഭാഗം പൂർണ്ണമായും തകർന്നുപോയി. തകർന്ന വാഹനത്തിൻ്റെ പുറത്തുവന്ന ചിത്രം ഞെട്ടിക്കുന്നതാണ്.
അപകടം നടക്കുമ്പോൾ ലെവൽ ക്രോസിങ് ഗേറ്റ് തുറന്നുകിടക്കുകയായിരുന്നു എന്നാണ് റിപ്പോർട്ട്. അപകടത്തെത്തുടർന്ന് ഈസ്റ്റേൺ റെയിൽവേയുടെ ഹൗറ ഡിവിഷനിലെ അസിംഗഞ്ച്-കത്വ സെക്ഷനിലെ ട്രെയിൻ സർവ്വീസുകളെ ബാധിച്ചതായും ഉദ്യോഗസ്ഥർ അറിയിച്ചു. സംഭവത്തിൽ റെയിൽവേ പൊലീസും പ്രാദേശിക പൊലീസും അന്വേഷണം ആരംഭിച്ചിട്ടുണ്ട്.
