ന്യൂഡല്‍ഹി : കേരളത്തിലൂടെ സർവ്വീസ് നടത്തുന്ന ധൻബാദ് – ആലപ്പുഴ എക്സ്പ്രസ് തിരുവനന്തപുരത്തേക്കും ആലപ്പുഴ – കണ്ണൂര്‍ എക്‌സിക്യൂട്ടീവ് എക്സ്പ്രസ് കാസര്‍ഗോഡ് വരെയും നീട്ടിയേക്കും. റെയിൽവേ മന്ത്രി അശ്വിനി വൈഷ്ണവുമായി ബിജെപി നേതാക്കൾ നടത്തിയ ചർച്ചയിലാണ് ഈ രണ്ട് സർവ്വീസുകൾ നീട്ടാൻ ധാരണയായത്.
സാങ്കേതിക പരിശോധന പൂര്‍ത്തിയാക്കിയശേഷമാകും ധന്‍ബാദ് ആലപ്പുഴ എക്സ്പ്രസ് തിരുവനന്തപുരത്തേക്ക് നീട്ടുക. നിലവിൽ 03:15ന് ആലപ്പുഴയിൽ സർവ്വീസ് അവസാനിപ്പിക്കുന്ന ട്രെയിൻ തിരുവനന്തപുരത്തേക്ക് നീട്ടണമെന്നത് വളരെക്കാലമായുള്ള ആവശ്യമാണ്. സർവ്വീസ് യാഥാർഥ്യമായാൽ ഉച്ചയ്ക്ക് എറണാകുളത്ത് നിന്ന് ആലപ്പുഴ വഴി തിരുവനന്തപുരത്തേക്കുള്ള യാത്രക്കാർക്കും വളരെയധികം പ്രയോജനപ്പെടും.
ഇതോടൊപ്പം തന്നെ ആലപ്പുഴ – കണ്ണൂര്‍ എക്‌സിക്യൂട്ടീവ് കാസര്‍ഗോഡ് വരെ നീട്ടുന്നതിനും അംഗീകാരം ലഭിച്ചിട്ടുണ്ട്. കാസർകോടേക്ക് എറണാകുളം ഭാഗത്ത് നിന്ന് രാത്രി യാത്രയ്ക്ക് ട്രെയിൻ വേണമെന്നത് ദീർഘകാലമായുള്ള ആവശ്യമാണ്. ഉച്ചയ്ക്ക് 03:50ന് ആലപ്പുഴയിൽ നിന്ന് പുറപ്പെടുന്ന ട്രെയിൻ രാത്രി 12:10 ഓടെയാണ് നിലവിൽ കണ്ണൂരിൽ സർവ്വീസ് അവസാനിക്കുന്നത്.
ആലപ്പുഴ എക്സിക്യൂട്ടിവിലെത്തുന്ന പയ്യന്നൂർ – കാഞ്ഞങ്ങാട് ഭാഗത്തേക്കുള്ള യാത്രക്കാർ കണ്ണൂരിൽ നിന്ന് കെഎസ്ആർടിസി ബസിനെ ആശ്രയിച്ചാണ് നിലവിൽ യാത്ര തുടരുന്നത്. ഈ ട്രെയിൻ സർവ്വീസ് നീട്ടണമെന്നതതും ദീർഘകാലമായുള്ള ആവശ്യമാണ്. വൈകീട്ട് 05:08ന് എറണാകുളം ജങ്ഷനിലും 05:23 എറണാകുളം ടൗണിലുമെത്തുന്ന ട്രെയിൻ രാത്രി 10:22ന് കോഴിക്കോട് എത്തും. ഈ ഭാഗത്ത് നിന്ന് കാസർഗോഡേക്ക് രാത്രിയിൽ ട്രെയിൻ വേണമെന്നത് വളരെക്കാലയമുള്ള ആവശ്യമാണ്.
