ന്യൂഡൽഹി : രാജ്യത്ത് ഏറ്റവും കുറഞ്ഞ ശിശുമരണ നിരക്കുള്ള സംസ്ഥാനമാണ് കേരളമെന്ന് കേന്ദ്രമന്ത്രി സാവിത്രി താക്കൂര്. രാജ്യസഭയില് എ എ റഹീം എംപി ഉന്നയിച്ച ചോദ്യത്തിന് മറുപടിയായാണ് കേന്ദ്രമന്ത്രി ഇക്കാര്യം വ്യക്തമാക്കിയത്. ശിശുമരണനിരക്കിന്റെ ദേശീയ ശരാശരി 1000 കുട്ടികള്ക്ക് 32 എന്ന നിലയിലാണ്. എന്നാല് കേരളത്തില് ആയിരം കുട്ടികള്ക്ക് എട്ടു കുട്ടികള് എന്ന നിലയിലാണ് – മന്ത്രി വെളിപ്പെടുത്തി.
ബിജെപി ഭരിക്കുന്ന സംസ്ഥാനങ്ങളായ മധ്യപ്രദേശില് 51, ഉത്തര്പ്രദേശില് 43, രാജസ്ഥാന് 40, ഛത്തീസ്ഗഡ് 41, ഒഡീഷ 39, ആസാം 40 എന്നിങ്ങനെയാണ് ശിശു മരണനിരക്കുകള്. കാലാകാലങ്ങളായി ഇടതുപക്ഷ സര്ക്കാരുകള് സ്വീകരിച്ച ജനപക്ഷ നയങ്ങളുടെ തുടര്ച്ചയാണ് ഈ നേട്ടമെന്നും സ്ത്രീകളെയും കുട്ടികളെയും പ്രത്യേക വിഭാഗമായി പരിഗണിച്ചു കൊണ്ടുള്ള ആരോഗ്യ സംവിധാനം ലോകത്തിനു തന്നെ മാതൃകയാണെന്ന് കാണിക്കുന്നതാണ് കേന്ദ്രസര്ക്കാറിന്റെ ഈ കണക്കുകള് എന്ന് എ എ റഹീം എംപി അഭിപ്രായപ്പെട്ടു.
