ഇന്ധനവിലയിൽ ചിറക് കിതച്ച് വിമാനങ്ങൾ ; സർവ്വീസുകൾ നിർത്തിവെക്കേണ്ട അവസ്ഥയെന്ന് കമ്പനികൾ

(Photo Courtesy : X)

ന്യൂഡൽഹി: പശ്ചിമേഷ്യൻ സംഘർഷത്തെ തുടർന്നുണ്ടായ ഇന്ധനവില വർദ്ധനവിൽ സർവ്വീസുകൾ നിർത്തിവെക്കേണ്ട അവസ്ഥയിലാണെന്ന് വെളിപ്പെടുത്തി വിമാനക്കമ്പനികൾ. ഇന്ധനവില വർദ്ധിക്കുന്നതിനാൽ ഇന്ത്യയിലെ എയർലൈൻ വ്യവസായം കടുത്ത സമ്മർദ്ദത്തിലാണെന്നും പ്രവർത്തനങ്ങൾ നിർത്തിവെക്കേണ്ട അവസ്ഥയിലാണുള്ളതെന്നും വിമാന കമ്പനികളെ പ്രതിനിധീകരിക്കുന്ന ഫെഡറേഷൻ ഓഫ് ഇന്ത്യൻ എയർലൈൻസ് ( എഫ്‌ഐ‌എ ) കേന്ദ്ര വ്യോമയാന മന്ത്രാലയത്തെ അറിയിച്ചു.

വ്യോമയാന ടർബൈൻ ഇന്ധന ( എടിഎഫ് ) വിലനിർണ്ണയത്തിൽ സാമ്പത്തിക സഹായത്തിലും പരിഷ്ക്കരണം ആവശ്യപ്പെട്ടതിനാൽ രാജ്യത്തെ വ്യോമയാന വ്യവസായം കടുത്ത സമ്മർദ്ദത്തിലാണ്. പ്രവർത്തനങ്ങൾ നിർത്തലാക്കേണ്ട അവസ്ഥയിലാണ്. ഒരു വിമാനക്കമ്പനിയുടെ ആകെ പ്രവർത്തനച്ചെലവിന്റെ ഏകദേശം 40 ശതമാനത്തോളം ഏവിയേഷൻ ടർബൈൻ ഫ്യൂവൽ എന്ന വിമാന ഇന്ധനത്തിനായി ചെലവാക്കേണ്ടി വരുന്നു എന്ന് എയർ ഇന്ത്യ, ഇൻഡിഗോ, സ്‌പൈസ് ജെറ്റ് എന്നീ കമ്പനികൾ കേന്ദ്രസർക്കാരിനെ അറിയിച്ചു.

പശ്ചിമേഷ്യയിലെ സംഘർഷങ്ങളെ തുടർന്നുണ്ടായ സാഹചര്യങ്ങൾ വിമാന കമ്പനികളുടെ പ്രവർത്തനത്തെ തകിടം മറിച്ചു. എണ്ണവില വർദ്ധനവും വ്യോമാതിർത്തി നിയന്ത്രണങ്ങളും പ്രവർത്തനച്ചെലവ് ഇരട്ടിയാക്കി. ഈ പശ്ചാത്തലത്തിൽ മുൻകാലങ്ങളിലെ പോലെ ഇന്ധന വിലനിർണ്ണയ സംവിധാനം ആഭ്യന്തര – അന്തർദേശീയ സർവ്വീസുകളിൽ ഏകീകൃതമായി വ്യാപിപ്പിക്കുന്നതിനുള്ള നടപടികളാണ് സിവിൽ ഏവിയേഷൻ മന്ത്രാലയത്തിൽ നിന്ന് ഫെഡറേഷൻ ഓഫ് ഇന്ത്യൻ എയർലൈൻസ് (എഫ്‌ഐ‌എ) ആവശ്യപ്പെടുന്നത്.

ജെറ്റ് ഇന്ധന വിലയിലെ വർദ്ധനയും ക്രൂഡ് ഓയിലും എടിഎഫും തമ്മിലുള്ള വ്യത്യാസം മൂലം വിമാനക്കമ്പനികളുടെ പ്രവർത്തനം മൊത്തത്തിൽ വെല്ലുവിളിക്കപ്പെടുകയാണെന്ന് ഫെഡറേഷൻ പറഞ്ഞു.
നിലവിലെ സാഹചര്യം മറികടക്കാൻ അടിയന്തരമായ സാമ്പത്തിക സഹായം നൽകുന്നതിനായി ഇടപെടൽ തേടുന്നുവെന്ന് ഏപ്രിൽ 26ന് അയച്ച കത്തിൽ പറയുന്നുണ്ട്. ദീർഘദൂര സർവ്വീസുകളെയാണ് നിലവിലെ ഇന്ധനവില വർദ്ധനവ് ഏറ്റവും രൂക്ഷമായി ബാധിച്ചിരിക്കുന്നത്. മുൻകാലങ്ങളിൽ നടപ്പിലാക്കിയിരുന്നത് പോലെ ആഭ്യന്തര – അന്തർദേശീയ വിമാന സർവീസുകൾക്ക് ഏകീകൃത ഇന്ധനവില നിശ്ചയിക്കുന്ന ‘ക്രാക്ക് ബാൻഡ്’ സംവിധാനം പുന:സ്ഥാപിക്കണമെന്നും വിമാനക്കമ്പനികൾ കേന്ദ്ര സർക്കാരിനോട് ആവശ്യപ്പെട്ടു.