ന്യൂഡൽഹി : ഡൽഹി ചെങ്കോട്ടയിലുണ്ടായ കാർ സ്ഫോടനത്തിൽ തീവ്രവാദ ബന്ധമുണ്ടെന്ന് സംശയിക്കുന്നതായി രഹസ്യാന്വേഷണ വൃത്തങ്ങൾ. തുടർന്ന്, സംഭവത്തിൽ യുഎപിഎ വകുപ്പ് ചുമത്തി കേസെടുത്ത് പോലീസ്. നിയമവിരുദ്ധ പ്രവർത്തനങ്ങൾ (തടയൽ) നിയമത്തിലെ (യുഎപിഎ) സെക്ഷൻ 16, 18 എന്നിവ ചുമത്തിയാണ് എഫ്ഐആർ രജിസ്റ്റർ ചെയ്തിട്ടുള്ളത്. സ്ഫോടകവസ്തു നിയമത്തിലെ സെക്ഷൻ 3, 4 എന്നിവയും കൊലപാതകം, കൊലപാതകശ്രമം എന്നീ കുറ്റങ്ങൾക്കൊപ്പം ചേർത്തിട്ടുണ്ട്.
സ്ഫോടനത്തിൽ എട്ട് പേരുടെ മരണമാണ് ഇതുവരെ ഔദ്യോഗികമായി സ്ഥിരീകരിച്ചത്. 13 പേർ മരിച്ചെന്നുള്ള അനൌദ്യോഗിക റിപ്പോർട്ടുകളാണ് പുറത്തു വരുന്നത്. ചെങ്കോട്ടയിൽ നടന്നത് ചാവേറാക്രമണമാണെന്നാണ് നിഗമനം. കറുത്ത മാസ്ക് ധരിച്ച് ഒരാൾ റെഡ് ഫോർട്ടിലെ പാർക്കിംഗ് ഗ്രൗണ്ടിൽ നിന്ന് കാറുമായി റോഡിലേക്കിറങ്ങുന്ന ദൃശ്യങ്ങൾ പ്രചരിച്ചിരുന്നു. .
പുൽവാമയിൽ നിന്നുള്ള താരിഖ് ആണ് കാർ വാങ്ങിയതെന്നും അയാൾ ഇപ്പോൾ പോലീസ് കസ്റ്റഡിയിലാണെന്നും അറിയുന്നു. ഫരീദാബാദ് ഭീകര സംഘടനയുമായി ഈ വാഹനത്തിന് ബന്ധമുണ്ടാകാമെന്നാണ് അന്വേഷണ ഉദ്യോഗസ്ഥരുടെ സംശയം. ഫരീദാബാദ് മൊഡ്യൂളുമായി ബന്ധപ്പെട്ട് ഒളിവിൽ കഴിയുന്ന ഡോ. ഉമർ മുഹമ്മദ് സ്ഫോടന സമയത്ത് കാറിനുള്ളിൽ ഉണ്ടായിരുന്നുവെന്ന് ഇന്റലിജൻസ് വിവരങ്ങൾ ഉണ്ടെന്ന് പറയപ്പെടുന്നുണ്ടെങ്കിലും ഇതിന് ഔദ്യോഗിക സ്ഥിരീകരണം വന്നിട്ടില്ല.
കാറിൽ നിന്ന് കണ്ടെടുത്ത മൃതദേഹം ഡോ. ഉമർ മുഹമ്മദാണോ എന്ന് ഉറപ്പാക്കാൻ ഡിഎൻഎ പരിശോധന നടത്തുമെന്ന് ഡൽഹി പോലീസ് ഉദ്യോഗസ്ഥർ പറഞ്ഞു. ഡൽഹി കാർ സ്ഫോടനത്തിൽ ഉപയോഗിച്ച ഹ്യുണ്ടായി i20 കാർ ഡൽഹിക്ക് സമീപമുള്ള ഫരീദാബാദിലെ സെക്ടർ 37-ൽ സ്ഥിതി ചെയ്യുന്ന റോയൽ കാർ സോണിൽ നിന്നാണ് വാങ്ങിയത്. അതേസമയം സ്ഫോടനത്തിന് ഉപയോഗിച്ച ഹ്യുണ്ടായി i20 കാറിന്റെ ഉറവിടം കണ്ടെത്താൻ ഡൽഹി പോലീസ് ഒരു ഡസനിലധികം സംഘങ്ങൾ പലയിടങ്ങളിലും റെയ്ഡുകൾ ആരംഭിച്ചു. സ്ഫോടനത്തിന് മുമ്പ് ഉച്ചകഴിഞ്ഞ് 3:19 ന് കാർ എവിടെ നിന്നാണ് യാത്ര ആരംഭിച്ചതെന്നും അത് എങ്ങനെയാണ് ചെങ്കോട്ട പാർക്കിംഗ് ഏരിയയിൽ എത്തിയതെന്നും കണ്ടെത്താൻ ഉദ്യോഗസ്ഥർ ശ്രമിക്കുകയാണ്.
സ്ഫോടനവുമായി ബന്ധമുണ്ടെന്ന് സംശയിക്കുന്നയാളുടെ പുതിയ ചിത്രം പുറത്തുവന്നു. സിസിടിവി ദൃശ്യങ്ങളിൽ നിന്ന് എടുത്ത ഈ ചിത്രം, സ്ഫോടനത്തിന് മുമ്പുള്ളതാണ്. മാസ്ക് ധരിച്ച വ്യക്തിയെ ചിത്രത്തിൽ കാണാം. തിങ്കളാഴ്ച വൈകുന്നേരം 6:52 ഓടെ ഡൽഹിയിലെ റെഡ് ഫോർട്ട് മെട്രോ സ്റ്റേഷന്റെ ഗേറ്റ് നമ്പർ 1 ന് സമീപമാണ് സ്ഫോടനം ഉണ്ടായത്. വാഹനം റെഡ് സിഗ്നലിൽ നിർത്തിയപ്പോഴാണ് സ്ഫോടനം ഉണ്ടായത്. സിഐഎസ്എഫ് സ്ഥാപനങ്ങൾ, ഡൽഹി മെട്രോ, സർക്കാർ കെട്ടിടങ്ങൾ, ഐജിഐ വിമാനത്താവളം എന്നിവ അതീവ ജാഗ്രതയിലാണ്. .
സ്ഫോടനത്തെത്തുടർന്ന് മാതാ വൈഷ്ണോദേവി ഗുഹാക്ഷേത്രം, അതിന്റെ ബേസ് ക്യാമ്പ് കത്ര, ജമ്മു നഗരം എന്നിവിടങ്ങളിലും റെയിൽവേ ട്രാക്കുകളിലും ജമ്മു-ശ്രീനഗർ ദേശീയ പാതയിലും സുരക്ഷ ശക്തമാക്കിയിട്ടുണ്ട്. മേഖലയിലുടനീളം അതീവ ജാഗ്രതാ നിർദ്ദേശം നൽകിയിട്ടുണ്ട്. തിങ്കളാഴ്ച രാത്രി കത്രയിൽ ഉന്നത പോലീസ് ഉദ്യോഗസ്ഥർ സുരക്ഷാ പരിശോധനകൾ നടത്തി.
