തിരുവനന്തപുരം : കെഎസ്ആര്ടിസിയില് 718 ബസുകള് കട്ടപ്പുറത്തെന്ന് വിവരാവകാശ രേഖ. സ്ത്രീ സൗജന്യ യാത്ര കെഎസ്ആര്ടിസിയുടെ വരുമാനത്തെ കാര്യമായി ബാധിക്കുന്നുവെന്ന ചര്ച്ചകള് സജീവമായിരിക്കെയാണ് കട്ടപ്പുറത്തുള്ള ബസുകളുടെ എണ്ണം സംബന്ധിച്ച വിവരം പുറത്തുവന്നത്. ആകെയുള്ള 5765 ബസുകളില് 718 എണ്ണം കട്ടപ്പുറത്താണെന്നാണ് കണക്കുകള് പറയുന്നത്.
ഗതാഗതയോഗ്യമായ അയ്യായിരത്തില്പ്പരം ബസുകളില് ഇന്ഷുറന്സ് ഉള്ളത് 1890 ബസുകള്ക്ക് മാത്രമാണെന്ന വിവരാവകാശ രേഖ ഞെട്ടിക്കുന്നതാണ്. ഇന്ഷുറന്സ് ഇല്ലാത്ത ബസുകള് അപകടത്തില്പ്പെട്ടാല് യാത്രക്കാര്ക്ക് കെഎസ്ആര്ടിസി മാനേജ്മെന്റ് നഷ്ടപരിഹാരം നല്കണമെന്നാണ് വ്യവസ്ഥ. ഇൻഷൂറൻസ് ഇല്ലാത്തതുകൊണ്ടുതന്നെ ഇത് പലപ്പോഴും വര്ഷങ്ങള് നീണ്ട നിയമപോരാട്ടങ്ങള്ക്ക് വഴിവെയ്ക്കും. 23 എ സി ലോഫ്ലോര് ബസുകള് ഉള്പ്പടെ 1922 ബസുകള് 15 വര്ഷത്തിലേറെ പഴക്കമുള്ളതാണെന്നും വിവരാവകാശ പ്രവര്ത്തകന് രാജു വാഴക്കാല ആവശ്യപ്പെട്ട രേഖയില് പറയുന്നു.
അതേ സമയം കെഎസ്ആര്ടിസിയ്ക്ക് ഡീസല് വാങ്ങാനുള്ള ചെലവെത്രയാണെന്നോ, ഉപയോഗശൂന്യമായ എത്ര വണ്ടികളെത്രയാണെന്നോ തുടങ്ങിയ ചോദ്യങ്ങള്ക്ക് കെഎസ്ആര്ടിസി മാനേജ്മെന്റ് മറുപടി നല്കിയിട്ടുമില്ല.
