ബംഗളൂരു : കർണാടകയിൽ ഡി.കെ. ശിവകുമാറിന്റെ നേതൃത്വത്തിലുള്ള പുതിയ മന്ത്രിസഭ അധികാരമേറ്റ് ദിവസങ്ങൾ ആയതേയുള്ളൂ. അതിനിടയിൽ തന്നെ ഭിന്നത പുകഞ്ഞ് പുറത്തുവന്നു. മുതിർന്ന കോൺഗ്രസ് നേതാവും മന്ത്രിയുമായ രാമലിംഗ റെഡ്ഡി തനിക്ക് കിട്ടിയ വകുപ്പിൽ അതൃപ്തി പരസ്യമായി പ്രകടിപ്പിച്ച് മന്ത്രിസ്ഥാനം രാജിവെച്ചു. നേതൃത്വത്തെ ഇക്കാര്യം നേരിട്ട് തന്നെ അറിയിച്ചതായും പറയുന്നു.
നഗരത്തിന്റെ ചുമതലയുള്ള ബംഗളൂരു വികസന വകുപ്പ് ലഭിക്കുമെന്നായിരുന്നു രാമലിംഗ റെഡ്ഡിയുടെ പ്രതീക്ഷ. എന്നാൽ, ലഭിച്ചതാകട്ടെ, ‘വലിയ-ഇടത്തരം ജലസേചന വകുപ്പ്’. അതൃപ്തിക്ക് ഇതിലുമപ്പുറം കാരണമെന്തിന് ?! ബംഗളൂരു വികസന വകുപ്പ് അല്ലാതെ മറ്റൊരു വകുപ്പും സ്വീകരിക്കാൻ തനിക്ക് താല്പര്യമില്ലെന്ന് എട്ടുതവണ എം.എൽ.എയായ ഇദ്ദേഹം കട്ടായം പറഞ്ഞുകഴിഞ്ഞതാണെന്നാണ് വിവരം. മറുഭാഗത്ത്, മുതിർന്ന നേതാവായ രാമലിംഗ റെഡ്ഡിയെ അനുനയിപ്പിക്കാനുള്ള നീക്കങ്ങൾ സജീവമായി നടക്കുന്നുമുണ്ട്. ഡി.കെ. ശിവകുമാർ സർക്കാർ അധികാരമേറ്റയുടൻ ഉണ്ടായ ഭിന്നത കർണാടക സർക്കാരിനുള്ളിൽ വലിയ ചർച്ചകൾക്കും ആശങ്കകൾക്കുമാണ് വഴിവെച്ചിരിക്കുന്നത്.
