കൊച്ചി: മുൻ ഭാര്യ ഗായിക അമൃതാ സുരേഷിൻ്റെ പരാതിയെ തുടർന്ന് നടൻ ബാല അറസ്റ്റിൽ. എറണാകുളത്ത് കടവന്ത്ര പോലീസാണ് അറസ്റ്റ് ചെയ്തത്. സമൂഹമാധ്യമങ്ങളിൽ അപകീർത്തിപ്പെടുത്തുകയും തനിക്കെതിരെ നുണപ്രചരണം നടത്തുകയും ചെയ്‌തെന്നാണ് പരാതി.
തിങ്കളാഴ്ച പുലർച്ചെ പാലാരിവട്ടത്തെ വീട്ടിൽ നിന്ന് ബാലയെ കസ്റ്റഡിയിലെടുത്ത ശേഷം അറസ്റ്റ് രേഖപ്പെടുത്തി. ജുവനൈൽ ജസ്റ്റിസ് ആക്ട് പ്രകാരമുള്ള ജാമ്യമില്ലാ കുറ്റമടക്കം വിവിധ വകുപ്പുകൾ പ്രകാരമാണ് ഇയാൾക്കെതിരെ കേസെടുത്തിരിക്കുന്നത്. സംഭവവുമായി ബന്ധപ്പെട്ട് ബാലയുടെ മാനേജരെയും അറസ്റ്റ് ചെയ്തിട്ടുണ്ട്.
സ്ത്രീത്വത്തെ അപമാനിച്ചതിന് ഐപിഎസി 354, മുൻ പങ്കാളിയുമായുള്ള കരാർ ലംഘിച്ചതിനു ഐപിസി 406, ജുവനൈൽ ജസ്റ്റിസ് ആക്ടിലെ 75 എന്നീ വകുപ്പുകൾ അനുസരിച്ചാണ് കേസ്. ബാലയെ കോടതിയിൽ ഹാജരാക്കുമെന്ന് പൊലീസ് പറഞ്ഞു.
ബാലയും മുൻ ഭാര്യ ഗായിക അമൃത സുരേഷും തമ്മിൽ തർക്കങ്ങൾ നിലനിൽക്കുന്നുണ്ട്. സോഷ്യൽ മീഡിയയിലെ ഇവരുടെ ഇടപെടലുകൾ വൻ ചർച്ചകൾക്ക് വഴിവെച്ചിരുന്നു. നിലവിലുള്ള കേസുമായി ബന്ധപ്പെട്ടാണ് ബാലയുടെ അറസ്റ്റെന്നാണ് റിപ്പോർട്ടുകൾ സൂചിപ്പിക്കുന്നത്.
