ഭുവനഗിരി : തെലങ്കാന യാദാദ്രി ഭുവനഗിരി ജില്ലയിലെ അലർ റെയിൽവെ സ്റ്റേഷന് സമീപം ചാർമിനാർ എക്സ്പ്രസിൽ തീപിടുത്തം. ട്രെയിനിന്റെ എസ് 5 കോച്ചിലാണ് തീപ്പിടുത്തമുണ്ടായത്. പുക ഉയരുന്നതോടൊപ്പം തന്നെ പെട്ടെന്ന് തീജ്വാലകളും ദൃശ്യമായതായി യാത്രക്കാർ പറഞ്ഞു.
കോച്ചിൽ തീ കണ്ടയുടനെ പരിഭ്രാന്തരായ യാത്രക്കാർ പുറത്തേക്ക് ചാടാൻ ശ്രമിച്ചു. ട്രെയിൻ ഉടൻ നിർത്തിയതായും യാത്രക്കാർക്ക് സുരക്ഷിതമായി പുറത്തിറങ്ങാൻ സാധിച്ചതായും റിപ്പോർട്ടുണ്ട്. പ്രാഥമിക റിപ്പോർട്ടുകൾ പ്രകാരം ആർക്കും പരിക്കില്ല. പക്ഷേ, സംഭവത്തെക്കുറിച്ച് റെയിൽവെ ഇതുവരെ പ്രസ്താവന ഇറക്കിയിട്ടില്ല.
തീപ്പിടുത്തം എങ്ങനെ ഉണ്ടായി എന്ന് അന്വേഷണത്തിന് ശേഷമേ വ്യക്തമാകൂ. സംഭവം റിപ്പോർട്ട് ചെയ്തയുടൻ റെയിൽവെ ജീവനക്കാരും പ്രാദേശിക രക്ഷാപ്രവർത്തകരും സ്ഥലത്തെത്തി. തീ അണയ്ക്കാനുള്ള ശ്രമങ്ങൾ ആരംഭിച്ചു, സ്ഥിതിഗതികൾ നിയന്ത്രണവിധേയമാക്കാനുള്ള ശ്രമങ്ങൾ തുടരുകയാണ്. ഷോർട്ട് സർക്യൂട്ട് അല്ലെങ്കിൽ സാങ്കേതിക തകരാറുകൾ മൂലമാകാം തീപ്പിടിത്തമുണ്ടായതെന്ന് സംശയിക്കുന്നു
തീവണ്ടിക്ക് തീപ്പിടിക്കുന്നതിന്റെ നിരവധി വീഡിയോകൾ വൈറലാകുന്നുണ്ട്. കോച്ചിൽ നിന്ന് പുകയും തീയും ഉയരുന്നത് ഇതിൽ കാണാം. പരിഭ്രാന്തരായ യാത്രക്കാർ ചങ്ങല വലിച്ച് ട്രെയിൻ നിർത്തി. പക്ഷേ, നിരവധി യാത്രക്കാർ ട്രെയിൻ നിർത്തുന്നതിന് മുമ്പ് തന്നെ ചാടിയിറങ്ങിയിരുന്നു.
